Ni 5, December, 2022 - 27, January, 2023 thla hnih dawn Mizoram ka cham chhunga in mi duhsakna leh tawiawmna chungah thinlung takin lawmthu ka sawi.

MZP buatsaih Zofest, Chintube People Choice Award semna, Appreciation Dinner leh Pray for Camp Victoria kan buatsaihna zawng zawnga min tawiawma, min ti thlamuang em em tu thứ leh hla tha tak tak min hlui kha a ropui in ka va lawm tak em! Mizoram Zaithiam lar tak tak te’n sum leh pai engmah phút nei lova “Chin kan unau te tan
kan tang zel ang, heihi kan tih theih tawk a ni” ti a thu leh hla a min awi (contribute) te kha a ropui in a va hlu tak em. Kei leh Chin unautehian kan theihnghilh tawh dawn lo. Pathian in a let tam takin malsawm che u rawh se tih hi ka tawngtaina a ni.

Kan hriat theuh angin February 1, 2021 a tangin kan Ram in buaina a tawka. Kum hnih chhung hian kan Inpui Mizoram ah sahimna zawngin a singtel kan lo raltlan a, Eiin, Silhfen leh chenna In etc. bakah tha leh zung mai ni lo kawng hrang hrangah ui nei hauh lova min tanpuina (ka sawiseng lo) kan lawmin thla a va muang em!! Mipui an thuhmun fo ngai lo tih ang deuh in raltlan zingah fel leh tha tam tak karah misual/tha lo tlem an lo in phumru ve bawk nen heng kan duh loh em em drugs leh sumdawnna tha lo rawn tawlh thla te an awm hi keini pawh hian pawi kan tiin dân anga an chunga na taka rorel turin kan duh bawk.

Chu tih rualin mitha pawisawi ve lo khawngaih thlak tak tak te én hrang lo hram turin kan ngen bawk che u. Tin, sual sipai te hian Mizo kan unau te nen kan in remna ti chhia turin kawng hranghrang in hma an la ve nasa em em bawk a, heng ruihhlo leh thil tha lo rawn tawlh thla te hi sual sipai họ leh an thurualpui te tactics a ni tih chiang takin kan hre bawk. Sual sipai nunrawng ho te thil tum lian ber chu Chin leh Mizo kara inrem lohna chawhchhuah (divide & rules) hi a ni.

Mizoram mipui hian khawngaih taka min hriatthiam pui theuh turin ka ngen duh bawk che u a ni. Kan Ram (Myanmar) buaina vang hian tam takin nunna an chân in hliam pui tuar, kut ke kim lo, mit khua hmu thei tawh lo, tam tak an awm in kan lungngai in kan rilru a rum tak meuh meuh a, heng depression, stress leh anxiety natna tuar te pawh tam tak kan awm phah bawk. 

Chu tiang karah kan Inpui Mizoram in duhsak tak leh hmangaih taka min tuamhlawma zalen taka min awm tir hi kan lawm zia kan sawi seng lo. Kawlho rahbehna hnuaia rei tak awm tawh kan nia Culture tlem in an loh na vangin zalenna hmang thiam tawk lo, eiin, incheina, khawlai leh biakin chenin awmdan thiam tawk lo leh in mittlung lo tam tak a awm ngei ang tih kan ring. 

Min hrethiama hmangaih taka min tuamhlawm ta sa sa, tha thlah hauh lova min enkawla zilh kan ngaihna ah pawh min zilha thu tha min hrilh zel tur pawhin kan sawm nghal bawk che u a ni. Keini pawn nungchang mawi leh nun dan tha a nung tur leh min hmangaihtu kan unau Mizoram mipui, Kohhran leh NGO te mít tikham zawnga awm lo turin kan inzirtir reng a ni tih min lo hriat sak hram kan duh a ni.

Tin, CBCUSA Women Department leh Central YMA te tangrual in drugs dona kawngah pawh thawhhona tha tak kan nei mek a. Kristian ram kan nihna angin sualna chu kan do zel dawn a. He buaina avang hian Mizoram chu Lalpa'n kan inpui ah min ruat sak a, Aizawl khua chu kan Jerusalem ah min siamsak a nih hi. Mizoram chu Chhinlung chhuak zawng zawngte kan sahimna leh kan in suihkhawmna kan Inpui ni turin Lalpa’n min ruat sak a vang hian kan va lawm tak em.

Myanmar Ram buaina hi eng chen nge a rei dawn kan hre lo. Ram buai reh hma leh reh hnuah pawh kan in unauna, duhsakna leh lainatna ti vul zela, in tawngtaipui tawn a, in tanpui tawn zel turin ka sawm nghal bawk a che u. Hla siamtu in “ Keini’n vanduaina a kan ruat a hmangaihna lan tirtu” a tih hi kan vanduaina hi kan in unauna ti nghet zual zel tu ni rawh se tih hi kan tawngtaina a ni.

Mizoram mipuite Lalpan malsawm che u rawh se. Amen, Ka Lawm e.
Thluai Zathang (Sailo nu)
Indianapolis, USA