September 2, Nimin tlai dar 5:30 vel khan Biakhlupuia s/o F. Zoramliana auto rickshaw driver, Lawngtlai Bazar chu mi tu tih hriat loh hmaituam ten kut an thlak a, police ah thubuai ziahluh a ni.

Lawngtlai Auto Rickshaw Owner's Association in thuchhuah an siam a an tarlan danin, Zoramliana hi Lawngtlai a MRB office bul atangin KMMTTP road ah mi pathumin hmangin, Electric Veng leh L-IV inrina lai velah a passenger te a drop hnuin a rawn let leh chu a motor a chiang lova. A motor siam lai chu tu tih hriatlohten a hnunglam atangin bei thut a. A hnung an khirh a, a hmai an tuam sak nghal a, thil eng emaw an barh a, ‘I lem vek loh chuan kan that ang che’ tiin an vau zui a. Vawithum lai an barh zui a ni.

Hemi hnu hian nikhua hre lovin hun eng emaw chen a awm hnuin a lo harh deuh hnuah Lawngtlai Auto-Rickshaw Owner’s Assocation Fin. Secy chu phone a biain, a awmna hmun te hrilhin an va hruai a ni.

Nizan ah District Hospital, Lawngtlai ah kalpui niin, District Hospital-ah enkawl a ni a. Tukin zingah Hospital atanga chhuah tir a ni.

F. Biakhlupuia tawhsual tawh chungchangah hian a chhungten Lawngtlai Police Station-ah FIR an thehlut a, Lawngtlai Police te hian he pawikhawihtute hi a rang thei ang ber a chhuichhuak a hremna pe ngei turin Lawngtlai Auto Rick-Shaw Owner’s Association chuan an phut a ni. 

He pawikhawihtute hi an tawng hman atangin hnam dang mi ngei an ni a hriat a ni a. An member in tawhsual a tawk chu Lawngtlai Auto-Rickshaw Owner’s Association chuan pawi a ti a, tun hnuah hetiang thil duhawmlo tak hi thleng nawn tawhlo se an ti hle tih thuchhuah siamin an tarlang.