ZALEN, Dec. 14, 2024: LBS Group-in Inrinni khan LPS Arena, Falkland-ah kum 20 tlin an lawm a, automobile dealership chi hrang pathum nen company hrang 12 thawhpuiin sumdawnna an kalpui mek.

Chairman T Zosangpuii chuan kum 2004 khan Bawngkawn Chhim Vengah thla khata Rs 500 chawiin dawr an luah a, secondhand bike pakhat hmangin LBS Group din a ni tih a sawi.

November, 2014 khan sponsorship lama hriat an hlawhna ber, LBS Suzuki showroom, Bawngkawnah an hawng a. LBS Group hnuaiah kum 10 chhung awm tawhin Mizorama lirthei hralh thei ber an ni mek a, Suzuki two wheeler 80,000 vel hralh chhuak tawhin an sumdawnna tiliantu ber a ni.

Sangpuii chuan, “Hmeithai chungin ka fate panga nen LBS Group hi kan enkawl a, a tirah tawn hriat kan neih loh avangin tih fuh loh pawh kan nei nasa. Mi tam takin kan hma lakna atan min tawngtaipui a, Lalpa kan au nasa; keimahni aṭang hian Pathianin hmeithaite a kalsan lo tih a langin ka hria,” a ti.

Suzuki Big Bike authorised dealer ni telin November, 2019 khan lirthei hlui a thara thleng theihna, Best Value an hawng tawh bawk.

Dealership dang hawn belh zelin furniture chi hnih, 2018 khan Evok leh 2019-ah Durian showroom hawngin, 2021 khan tlereuh zawrhna, Mia Tanishq leh sana zawrhna, World of Titans dawr an hawng a ni.

Automobile lamah 2022-ah Kia car leh 2023-ah Force Motors showroom an hawng belh a. Oil leh Battery division lamah Gulf, Idemitsu, Ecstar, Tata Green leh Exide dealer an ni bawk.

LBS Group hnuaiah hnathawk 200 dawn awm mekin Sangpuii chuan, “Lalpa rin chhana kal kan ni a, tawngtaina kan hmachhuan a, Pathian hi kan tan a va tha em. Lalpa min tihsak a nih avangin amah tiha a thu kan awi zel a ngai a, hnathawkte pawhin chu chu kan hriat a ngai a ni,” a ti.

Kum 20 chhunga an tana tangkaite ngaihlutna thilpek an hlan a, 2024 chhunga peng hrang hranga hnathawk tha leh hna ngai pawimawhte hnenah chawimawina award leh Rs 5,000 ṭheuh an pe bawk.

Managing Director H Ngurdingliana chuan anmahni puitute chungah lawmthu a sawi a, “Mi tam tak hnathawh Pathianin mal a sawm avanga LBS Group hi din thei kan ni,” a ti.

Kum 20 tlin lawmnaa kalte tan zanriah chawhlui an buatsaih a, zan lamah musical concert siamin hlim takin hun an hmang a ni.