ZALEN, Feb. 08, 2025: LBS Kia Motors chuan Ajal Club Park, Aizawlah Inrinni khan Kia Syros an tlangzarh a, car dang an zawrhte nen a pianhmang leh ruangam a inan loh avangin beiseina an neih san phah.

September, 2022 khan LBS Kia showroom hawn a ni a, Kia car chi thum - Sonet, Seltos leh Carens zuarin a vaiin 600 vel an hralh chhuak tawh niin an sawi.

Mizoram Lokayukta Deputy Secratary Lalmalsawma Hnamte leh LBS Group Board member Joseph Lalthanpuia’n Mizorama hralh chhuah turin Syros an khuh hawng a, an car dang nena khaikhinin a pianghmang a danglam bik a, Kia-in Carnival electric car a siam chhuah zulzuiin a ruangam duan a ni.

Lalmalsawma chuan Mizote duh tur leh fuh tak a nih a beisei a, LBS Kia vehicle incharge Vanlalfakawma chuan India ram SUV khawvela bung thar kaipuitu tur a nih thu sawiin, “A pianhmang, a thatna leh thiamna hrang hrang a ken tel bakah, a him tha a, changkang taka thuam a ni,” a ti.

Kia India Senior Vice President Hardeep Singh Brar chuan, lirtheia sumdawng tan kum bultan tan that a pawimawh em em tih a sawi a, “Kumin kum tirah Kia Syros an tlangzarh theih avangin tha takin bul an tan chho thei dawn a, mipuiin an ngaihven hle a ni,” a ti.

Kia SUV thar Syros hi petrol leh diesel engine hmang a hranin a awm a, Rs.nuai 10 atanga 20 man thlengin a awm a, LBS Kia showroom, Falkland Vengah Zemabawk road-ah khalh chin duh leh hre chiang duh tan ngaihven theih reng a ni.