ZALEN, May 15, 2025: LBS Group chuan LBS Suzuki hnuaia an sumdawnna huang zauh belhin, Ningani hian Kulikawn West-ah showroom leh service station an hawng a, Aizawl district chhunga pathum an hawnna a ni.

Suzuki Motorcycle India Private Limited hnuaia Service lama Regional Manager Niladri Sekhar Chakraborty chuan ribbon chet chatin a hawng a, hmasawn zel tura rahbi pawimawh a nihzia sawiin LBS Suzuki hnenah duhsakna a hlan.

Mi paliin scooter an lei chhuak nghal a, Service lama Zonal Manager Anupam Singh chuan lirthei lei hmasate hnenah chabi leh thilpek hlanin, Suzuki motorcycle sumdawnna huang a zauh zel nan LBS Suzuki-in showroom an hawn belh avangin lawmthu a sawi bawk.

November 30, 2014 khan Bawngkawn, Aizawlah LBS Suzuki-in Suzuki two-wheeler dealership a hawng a, Mizorama district hrang hrangah inzar pharhin branch a hawn zel hnuah April khan Darlawnah a hawn belh a, Kulikawn West, Aizawla a hawn leh hnuah an hmunpui, Bawngkawna mi nen Aizawl district chhungah showroom pathum a nei ta a ni.

LBS Suzuki Dealer Principal H Ngurdingliana Ngurte chuan an hmunpui Bawngkawna an tih theih ang zawng zawng Kulikawn West-ah an kalpui vek dawn tih a sawi bakah, Aizawl chhim lamah duhsaka anmahni dawrtu thahnem tak an awm a, traffic tawt avanga harsatna sutkian a nih theih nan hma an la tih a sawi bawk.

Kum nga kal ta atang khan Kulikawn West-ah hian service station an kalpui tawh a, chawhrualin ni tin lirthei 50-60 an khawih thin tih sawiin, tunah chuan service leh showroom changtlung tak hawn a ni thei ta a, Aizawl chhim lam mite tan awlsamna a nih ngei a beisei.

Mizorama two-wheeler dealer hrang hrang zinga hralh chhuak hnem ber, LBS Suzuki hian Kulikawn West khawtlang hruaitute nena tha taka thawh ho an duh tih Ngurdinga chuan a sawi a, showroom leh service station thar hawnnaah hian YMA Branch hnenah tanpuina sum fai an hlan nghal a ni.

India rama Suzuki Motorcycle dealer zingah LBS Suzuki-in pakhatna nihna a nei fo thin a, April, 2025 chhunga lirthei hralh tam ber an nih bakah service lama titha ber a lo ni tawh thin a ni.