LBS Suzuki Youth Icon-a tel mi 453 atangin 272-in round hmasa ber an paltlang a, Thawhlehni zan dar 8 atangin LPS Studio, Zarkawtah round hnihna inzaisiak tan a ni ang.

Round hnihna hian September 10 atanga 20 a awh dawn a, zan riat chhung zan khatah mi 27 zel an zai ang a, zan hnih dangah mi 28 ve ve zai ve lehin September 21 zanah result puan a ni ang.

Round hnihnaah hian mi 30 atanga 40 tling tura ruahman a ni a, LPS Studio-ah tho September 25 atanga 27 chhung intihsiak zui lehin a thiam 10 thlan chhuah an ni leh ang.

October 7 atangin LPS Arena, Falkland-ah mipui chhim theih turin a thiam 10-in inelna an chhunzawm ang a, October 19-ah Youth Icon thlang felin zan dar 8-ah zel inzaisiak tan a ni dawn a, LPS 1-ah live a ni ang.

Youth Icon-in trophy leh Rs 2,00,000 an dawng dawn a, lawmman pawisa fai Rs 4,40,000 sem chhuah a ni ang.

Youth Icon contest hnuhnung ber 2019-a judge Victor Vanlalhruaia leh Rosy K Remsengpuii bakah, a vawi khat nan Andrew Laltlankima chu judge a ni dawn bawk.

Kum nga kal ta ang bawkin LBS Suzuki, Bawngkawn chu title sponsor an ni leh a, Hõm Furniture, Bawngkawn leh Sailo Agencies Home Appliances, Ramhlun South-in an sponsor bawk a ni.