LBS Suzuki Youth Icon-a second round intihsiakna chu Thawhlehni zan khan LPS Studio, Zarkawtah tan a ni.

Youth Icon 2004-ah mi 453 atangin 272-in round hmasa ber an paltlang tawh a, round hnihna intihsiakna hi September 20 thleng a awh dawn a, zan riat chhung hian zan khatah mi 27 zel an zai ang a, zan hnih dangah mi 28 ve ve zai ve lehin September 21 zanah result puan a ni ang.

Second round-ah hian zai rem nan guitar emaw, keyboard emaw duh zâwk zâwk hman theih a ni a, a duh tan hman kawp theih a ni bawk a. Rimawi tumna hmanrua hi mahni intum theih a nih bakah a nei lo tan a hmunah chhawp a ni a. A duh tan zai remna tel lova zai theih a ni bawk.

Hla châng hnih leh a thunawn sak tur a ni a, chang 1-na, a thunawn, chang 2-na leh a thunun thleng sak tur a ni a. Bridge nei hla a nih chuan chang 1 leh thunawn, bridge leh thunawn sak tur a ni thung.

Round hnihnaah hian mi 30 atanga 40 tling tura ruahman a ni a, LPS Studio-ah tho September 25 atanga 27 chhung intihsiak zui lehin a thiam 10 thlan chhuah an ni leh ang.

October 7 atangin LPS Arena, Falkland-ah mipui chhim theih turin a thiam 10-in inelna an chhunzawm ang a, October 19-ah Youth Icon thlang felin zan dar 8-ah zel inzaisiak tan a ni dawn a, LPS 1-ah live a ni ang.

Youth Icon-in trophy leh Rs 2,00,000 an dawng dawn a, lawmman pawisa fai Rs 4,40,000 sem chhuah a ni ang.

Youth Icon contest hnuhnung ber, kum 2019-a judge atangin pahnih, Victor Vanlalhruaia leh Rosy K Remsengpuii bakah a vawi khat nan Andrew Laltlankima chu judge a ni bawk.

Kum nga kal ta ang bawkin LBS Suzuki, Bawngkawn chu title sponsor an ni leh a, Hõm Furniture, Bawngkawn leh Sailo Agencies Home Appliances, Ramhlun South-in an sponsor bawk a ni.