- Lalzidinga Sailo Mob. 9436140644 Tunlai hian lehkhabu siam a, ziaktute hi kan fimkhur a va han ngai em! Mizote hi ziak leh chhiar satliah mai nilovin, lehkhathiam kan tam tawhin, saptawng thiam pawh kan tam tawh a, fimkhur hi a ngai em em a ni. Hmanlai chanchin kan ziahte pawh hi hria nih tum lutuk emaw, lehkhabu dang atanga lakchhuah, a ziaktu hmasate ziah dan ni lem lova mahni duh dan zawng ni awm taka lo ziak ta mai te pawh kan awm ta tlat maite hian kan rilru put hmang a tilang chiang thei khawp mai. Tin, thlalak hlui, hmanlai kan Sailo Lal thlalakte pawh an hming kan phuahchawp sak ta tlat mai, a va pawi em! Hetiang hi kan thangthar lehkhazirte tan a pawi thei em em a ni tih hi hriat a tha hle mai. T.H. Lewin leh Lusei lalho Calcutta-a an zin thlalaka mite pawh an duh duh hming an puttir ta mai a nih hi. He thlalak hi tunhma phei kha chuan Bawrhsap pisa kawngkapui chungah khian an tar thin a ni. He thlalaka Sailo lalte hming hi “Zoram Vartian” tih lehkhabuah leh “Mary Winchester Zoluti chanchin” tih lehkhabuah khan, Pu Lalngura Sailo kha Rothangpuia tiin an chhuah ngawt a. Heta Sailo lalte hi – Lalngura (Lungleng lal Khamliana pa), Vankunga, Vanhnuaia, Lalngurha (Brig. T.Sailo pu), Rothangpuia te leh T.H.Lewin-a hruai tawnglettu leh a hmunphiat te an ni. Hemi bakah pawh hian, Mary Winchester Zoluti Chanchin, phek 33-na, bung 7-ah pawh khan Pu Kairuma Biate lal te, Pu Khamliana Lungleng lal te, Pu Suakhnuna Tachhip lal te bakah lal dang (an hming tilang vek lo mai ila) a rawn tilang a, an hming a rawn phuahchawpsak lo hlauh mai. Tin, phek 34-naah khan Pu Savunga chu ‘Liandula thlah’ tiin a rawn ziak a, Savunga kha ‘Lianlula thlah’ a ni a, Lianlula fapa naupang ber Darliankuala fapa neihchhun a ni. Phek 41-naah khan Khamliana kha ‘Kalkhama’ tiin a rawn ziak a; tin, phek 42-na, bung 8 tannaah Lalngura kha ‘Rothangpuia’ tiin a rawn ziak bawk. Phek 66-ah khan phek 28-na leh 43-naa mi thlalak a rawn tar nawn leh a, hming erawh a rawn phuahsak ta lo a ni. Ziak a thu/chanchin kan dah dawn a nih chuan kan hriat chian loh chu a hriate zawh mai hi kan tih tur a ni. Chuti nilova kan rin dan ang ang a kan ziah mai chuan mi dangte thu dik lo kan chhiartirin, thu dik lo kan hrilh tihna a ni dawn a ni. Heta an hming hi “Zoram Vartian” tih lehkhabua mi a lakchhawn ni ngei tur a ni a, a lakchhawnna lehkhabu hi belhchian a dawl tawk lo hle reng a ni. Zoram Vartian lehkhabu-a tarlan, a lehkhabu rawnte hi mi tam takin kan neihve a rinawm a. Heng lehkhabu tun hma Lushai Hills (Mizoram) a awm tawhho ziah te, Mizo mi hmasaho ziah lehkhabute hi hmuh tur ala awm a, chhiar theih reng a ni e. Zoram Vartian lehkhabu pawh hi zir chian deuh chuan a thulakna lehkhabu a an ziah dan ni lo deuhva ziah a awm nualin a hmuh theih. T.H.Lewin lehkhabu ziaha mi Mizotawnga lehlin dan pawh hi saptawng thiam sawih sawih tan pawh a dik tawk lo niin a lang. Tin, he lehkhabu hian a tum ni-a lang chu Pu Khamliana Sailo, Lungleng lal ai khan Pu Suaka leh Pu Thangphunga te, sawrkar hna atanga an pension hnua lal anga an dahte kha an lo ropui zawk e, tih tumna lian tak nei a ziak niin a ngaih theih awm e. Kum 1994-a Mizoramin Gospel Centenary a lawm khan anni pathum hi stall hran theuh pek an ni a. Pu Khamliana chhungte chuan a lehkha pawimawh, a certificate te leh a bungrua eng eng emaw dahin hmunin a daih loh avangin an dah vek thei lo zawk a ni. Pu Suaka leh Pu Thangphungate khan engmah entir tur vak an neih loh avangin Pu Khamliana puala stall an pek chu an tawm ve ta a ni. Tin, Zoram Vartian lehkhabu ziaktu hian, Pu Khamliana chungchang ziah lan tum si hian engati nge a tu leh fate pakhat mah a biak rawn loh, tih hi zawhna a awm thei bawk. Pu Khamliana pa, Lalngura pawh Rothangpuia Thangluah, tiin a ziak ringawt bawk a, hei hi Mary Winchester Zoluti Chanchin lehkhabu siamtu pawhin a rawn tive leh chiah bawk. Hei hian Sailo Lianlula thlah ho pawi thui tak a sawi a ni. Zoram Vartian lehkhabuah hian Dokhama kha Pu Khamliana, Pu Suaka, Pu Thangphunga leh Pu Chawngkhumate Sap Missionary te bula lo hruai tlangneltu niin a ziak a, hei hi a dik lo va, hetiang zawk hi a ni – Pu Khamliana kha kum 1871-1872 lai khan tleirawl kum 13 mi vel a ni a, a pa, Lalngura bula awm lovin a pu, Savunga bula awm a ni. General Brownlow te leh T.H.Lewin-a te hovin Buarpui an kah chhiat lai pawh khan Buarpuiah a Pu bula awm a ni. Saphovin an khua an kahchhiat tak vek avangin a pu Savunga khan Gen. Brownlow te kha saui tanna a neih pui a, chumi hriatrengna tur pawh Buarpui MUP-in lung an phun nghe nghe a ni. A hnuah phei chuan anmahni veng tur sipai a pe hial a ni. Kum 1878 laia Chittagong Bawrhsap khan Tlabungah te, Rangamati-ah te Mela an siam thin a, chutah te pawh Saphoin an duhsak thinzia leh a pu hmingchawia “Savung Raja” tia an koh thin thute pawh Pu Khamliana hian ni 5.8.1911-a ama ziak ngei hmuh theihin a la awm vek a ni. British sawrkarin an hriatchian dan ziak awm leh chu hei hi a ni. The Feudatory and Zamindari India, an Illustrated Monthly Journal devoted to the Interests of the Ruling Princes, Chiefs, Zamindars, etc. April, 1924-a chhuak phek 372-373-ah chuan Khamliana Sailo, Chief of Lungleng, tiin a chanchin chhuah a ni a. “For the last two centuries...” tia bultanin Sailo Lusei rama roreltute tiin, Pu Savunga atanga tanin Mary Winchester an chhanchhuah tuma Savunga’n a lo beih dan te leh inremna an siam thu leh mi rintlak leh rinawm a nih thute ziah a ni a. Khamliana chu Savunga rokhawmtu a nih thu te, an harsat tak hnua lal thlah dangten an beihrawn chung pawh a an thlahtute atanga an ram Khamliana’n a hum chhoh dante ziah lan a ni a. Chubakah British hovin awm ngheh an tum tuma British-ho lokalte pawhin Khamliana an hriat tawh thu leh, Aizawl bul hnaia khua din tha leh tura an tih thute a inziak vek a ni. Tin, Missionary hmasaten sikul an din a lut hmasa berte zinga pakhat a nih thute bakah, ama in ngeia mi dang lehkha a zirtir thin thu te ziah lan a ni. Tin, Missionary Sap khan amah Pu Khamliana leh a pu, Pu Savunga hmu châkin kum 1894 khan Lunglengah an zuk kal vat zawk a ni. Hemi tum hian Pu Savunga phei chuan a lo hmu duh lo va, kawmchar lamah a chhuahsan daih nghe nghe a ni, an ti. Zoram Vartian lehkhabu phek 281-naah hian, “Pu Buangan kum 1912-a Thangliana lehkha a thawnah Khamliana chu a thian tha a nih thu leh zirlai thiam thei berte zinga mi a ni, a tih thu a zuk hrilh, tih leh kum 1894 October ni 26-ah Khamliana hian ziak leh chhiar a zirve thu Pu Buanga ziak atangin a lo lang chiang ta a ni,” a ti a. ‘Pu Buanga Log Book’ an tiha 26th Oct. 1894-a Chief Khama tih an ziak kha Khamliana Sailo, Lungleng Lal a ni lo tih ka han sawi bawk a ni. ‘A Fly on the Wheel or How I helped to Govern India’ tih lehkhabu Lt.Col. Thomas H.Lewina ziah tawp lamah khan, Rev. J.H.Lorrain (Pu Buanga), Lusei rama Missionary in tahrik ni 25 April, 1899-a Lt.Col. Thomas Lewin lehkha a thawnah chuan a tawp lamah ti hian a ziak si a, “..... One of these you will I am sure remember, the chief Savunga. He was very old, when first we knew him, and died about two years ago. Just before his death I visited his village, and I shall never forget the time I spent with him. He was a grand old warrior and retained his faculties to the last revered even by his enemies. His grandson, Khamliana, is a fine fellow, one of our staunchest friends and best pupils. He still cherishes the double-barrel gun which his father, Lal Ngura, received from you when he accompanied you to Calcutta,” tiin. A hma lama sawi ang khan, Pu Khamliana Missionary te bul a hruai tlangneltu chu Dokhama a tih pawh hi a dik lohzia chu Pu Buanga thuziah hian a tichiang zual a ni. Pu Savunga kha kum 1896-ah Lungleng khuaah kum 120 mi niin a thi a, a thih hma kum 1894 khan Pu Buanga te khan an zuk tlawh tih a lehkhathawn atang khian a chiang tawk a ni. Pu Savunga thih hian, khatihlaia Sap pa, J.Shakespearea pawh khan Lunglengah zuk kalin Pu Khamliana kha Sial pahnih, Kel pakhat, vawk pakhat leh Sapzu saidawium sawmin a zuk thlaichhiah nghe nghe a ni. (Khamliana lehkha 5.8.1911). Tin, Zoram Vartian lehkhabu phek 282, paragraph 2-ah bawk khan “.....he lehkhathawn avang hian Sailo lal Khamliana hi a aia ziak leh chhiar thiam hmasa Thangphunga leh Suaka te aiin a lar phah ta zawk a ni. A lehkha thawn kum hi Laltluangliana Khiangte leh B.Lalthangliana te chuan kum 1894, April thla niin an ziak a, hei hi chu a dik lo deuh va, Khamliana hian October thlain a zir tan a...” Heta a tarlan Laltluangliana Khiangte leh B. Lalthangliana ziak hi a dik zawk a, a chhan chu Pu Buangate sikul dinah Suaka leh Thangphunga kha an lut hmasa hret a, ni hnih/khat hnuah Khamlianan a han zawmve a; mahse, kar khat lekah ziak leh chhiar a thiam ta mai bik zawk a ni (A fapa Vanhnuaithanga Sailo te nupa leh a tupa upa ber Master Warrant Officer Lallinga Sailo hnena amah Khamaliana ngeiin a sawi dan chuan ni 12 leh zan 13 a awm ve a ni). Lal a nih angin a khua leh tuite a awm bosan reng thei lo va, a hawsan leh ta a ni. Pentui leh pen te insiamchawpin Pu Buanga te lehkhathawn hi a ziak a ni. He lehkhathawn hi Mizo kutchhuak hmasa ber a ni bawk. Suaka leh Thangphunga te hi chu Superintendent Office a thawk an ni a, Khamliana chu Lal a ni. Mizo Lalte kha British-ho lo chhuah hma chuan an ram chhungah chuan an aia lal an awm lo a ni. Zoram Vartian lehkhabu phek 282-na, paragraph tawp bera a rawn ziah lan pawh hi, “Mi dang aia a ziah thiam hma chhan pawh, tunhmain silai license-a thuziakte chu a awmzia hre hleilova a lo ziahchhawn thin vang a ni,” tiin Pu Buanga khan a ziak a. Chutichuan, kutziak ngei a thiamna lo pholang hmasa lal fing tak a ni a, hun lokal zelah ziak leh chhiar thiam hmasa ber chu Khamliana nia ngaiin an lo sawi chhawng ta zel a ni,” tiin a ziak lang a. Pu Buanga, an zirtirtu pawhin thiam hmasa ber a tih chu engvangin nge Zoram Vartian lehkhabu siamtu hian Suaka leh Thangphungate hi ziak leh chhiar thiam hmasaber tia a lo ziah ve ngawt ang? Lehkhabu meuhva siam tur chuan thu dik awmsa hi ziah mai tur a ni. Tin, Khamliana kha Lusei tawng (Duhlian) ziak leh chhiar thiam hmasa ber chauh a ni lo va, Missionary Sap lokal hma pawhin Bengali tawngte pawh a lo zir tawh a ni. Zoram Vartian lehkhabuin lehkha thiam hmasa ber chungchangah hian a lehkhabu rawn a ziahlante hi han bihchiang ve ila - Pastor Liangkhaia’n Mizo Chanchin a ziah June 1938, phek 131-ah chuan, “Hetih laia Sap puitu berte chu tunhnua Durtlang lal Pu Suaka, Chaltlang lal Pu Thangphunga leh Lungleng lal Khamliana te kha an ni. He mite zingah pawh hian Khamliana hian lehkha a thiam hmasa ber a, Mizoram lehkha thiam hmasa ber a ni,” tiin a ziak zawk a ni. A lehkhabu rawn dang a ziah lan pakhat Mizo History, Pu V.L.Siama ziak, Lengchhawn Press-in kum 1991 a an chhut nawn lehah chuan phek 139-ah Suaka te hi lehkhathiam hmasa anga ziakin a sawi a; mahse, he lehkhabuah hian phek 103-na thleng chauh a awm bawk si a. Tin, Mizoram Baptist Kohhran chanchin pawimawh lak khawm, Rev. V.Lalzawnga BD ziakah pawh hian phek 382-na awm lovin, phek 300 thleng chauh a awm bawk a ni. Tin, a thu rawn lakna Http://www.freewebs.com/durtlang/suaka.htm/ pawh hi tunah phei chuan entur pawh a awm zui tawh lo a ni.(Frozen tiin tunah chuan thlak a ni) Mizote zinga ziak leh chhiar thiam hmasa ber chungchang hretu tan leh Zoram Vartian lehkhabuin a lehkhabu rawnte ziak dan nilova a ziah lante hi a pawi hle. Ziaktu dangten engtin nge an ziah tih lo en ve leh ila: 1) Mizo Chanchinbu-I, Zatluanga ziak phek 256-ah chuan – “Khamliana hian lehkha chhiar leh ziak a thiam hmasa ber a. Zoram lehkhathiam hmasa ber a ni.” 2) Mizoram Welsh Missionary te Chanchin, J.V. Hluna ziak phek 16-ah chuan “Zotawng ziak leh chhiar hiam hmasa ber chu Lungleng lal Khamliana a ni.” 3) ‘Mizoram zirnaa Mission leh Kohhran Rawngbawlna’ Upa K.L.Rohnuna ziak phek 51-ah chuan, “Lungleng lal Khamliana pawh a zir hmasa zingah a tel a, Mizo lehkhathiam hmasa ber chu Khamliana a ni, an ti thin.” 4) ‘Zalen nana British Do,’ Dr. Thanliana ziah phek 197-ah chuan, “Mizo zinga ziak leh chhiar thiam hmasa berte chu Pu Suaka, Pu Thangphunga, Pu Khamliana leh Babua te an ni.” 5) ‘Zoram zirna lam chhinchhiahna (The Records of Zoram Education),’ Lalhmuaka ziak phek 15-ah chuan “......Tin, Dictionary (Lushai into English) leh Grammar an siam bawk.... chung an hnathawhpuitute chu Khamliana (hmar Lungleng lal, he tlangval hi an fak hle mai), Pu Suaka (Rahsi atangin Dahrawkah a kai a, Durtlangah lalna pek a ni leh). Pu Thangphunga Chaltlang lal a ni..... Heng mite leh midangte chhiar leh ziak an zirtir thin a, an zingah chuan Pu Khamliana hian a thiam hmasa ber a, ‘Lehkhathiam hmasa ber’ tih a ni thin.” 6) ‘Mizoram School Hmasate (1894-1952)’ Rev. C.Lianzuala ziak phek 10-ah pawh Khamliana Lungleng Lal hi Mizorama lehkhathiam hmasa ber tih a ni. A chunga kan han tarlante bakah pawh hian ziaktu tam takin Khamliana hi lehkhathiam hmasa ber ani tih thu hi an ziak vek zawk a ni. Heta tarlan loh Dr. Laltluangliana Khiangte pawhin a ziak bawk a ni. Anni bakah pawh hian ziak an la awm nual a, tun hnuah Zoram Vartian lehkhabu ziaktute hian thu dik lo thehdarh an tum mai zawk a ni thei em? Zoram Vartian lehkhabu han en hian Pu Khamliana aiin Pu Suaka leh Pu Thangphungate hi thiam hmasa zawk anga chhuah a tum hrim hrim ni theiin a lang a, an tu leh fate, anmahni pawh hmu pha lote be rawnin a ziak a. Chutih laiin Pu Khamliana hmu pha, a tu leh fa leh amah enkawltu Lungleng lalnu bakah a tu leh fate pawh tumah rawn lova hetianga a chanchin a rawn ziak ta mai hian a lehkhabu hi rintlak lovah a chhuah phah a ni. Pu Khamliana hringtu Pu Lalngura pawh Rothangpuia, tiin a dah a, hengahte hian an thlahtu an pute chanchin chu an hre chiang ve thawkhat ang tih hriat a, rawn hmasak awm tur a ni. Hetianga thil hrechiang lova lehkhabu siam hi thangtharte tan a pawi em avangin, lehkhabu ziak tur chuan fimkhur tak leh a hriate rawn hmasa a ziah thin tur a ni. History of Mizo Literature, Mizo tih bu Mizoram University Three Years Degree Course atana siam pawh hi zirtlak loh lai tam tak a awm phah a ni. Chuvangin diklo taka thil ziah chingte hi hnam hmelma an ni e, i fimkhur ang u. Pu Khamliana Sailo, Lungleng Lal hi chu Sailova atanga Lal inthlah chhawng zel a ni a. Sailova fapa naupang ber - Lianlula fapa naupang ber Darliankuala fapa neihchhun Savunga fapa upa ber – Lalngura (Vartian Lehkhabu in Rothangpuia ti-a a lo phuahve ngawt) fapa a ni.