ZALEN October 1, 2023 : Bairabi leh Sairang inkara rel kawng siam mek chu December, 2023-ah hawn tum ni mah se, kumin August 23-a Bridge No. 196, Sairang zero point bula lei dawh lai chim vangin thla 6/7 vel hun a duh belh dawn a, hei vang hian a hawn hun pawh a tlai phah dawn.

North Eastern Frontier Railways consultant Hrangtawna, IRTS (Rtd) hnen atanga ZALEN thudawn danin, tun dinhmunah hna ngawrh taka thawh mek a ni a, hetihlai hian lei dawh chim ta hmanruate chu a thar vek a siam a ngaih dawn avangin thla ruk atanga thla sarih vel hun a duh belh a rinawm tih a sawi.

Thudawnnain a sawi danin tun hnaia rel kawng siam mek lei dawh chim chhan chu railways thuneitute hmalakna angin chhui zawh a ni tawh a, hetihlai hian an chhuina report erawh an la dawng lo.

Prime Minister Narendra Modi-a’n November 29, 2014-a lungphum a phum, Bairabi-Sairang rel kawng tur hi km. 51.38-a thui a ni dawn a, a tirah Rs. vbc. 2,384.34 ruahman niin zawh hun tur chu March, 2020 a ni.

Tunah chuan sum senso tura tih chu Rs. vbc. 5,000 a ni tawh a, a zawh hun tur pawh December, 2023-ah sawn hlat niin prime minister hawntir tum a ni a, lei dawh chim vangin hawn theih a ni dawn ta lo a ni.

Bairabi-Sairang rel kawng hi a lian chi (broad gauge)-a siam a ni a. Hortoki, Kawnpui, Mualkhang leh Sairangahte chawlh hmun (station) siam a ni dawn a. Rel kawngah hian lei 196 dawh a ni dawn a, lei sei ber chu km. 1.04 (meter 1,042)-a sei tur niin dawh mek a ni a. Lei ban tur bik chu hmun pakhata phun mek bak chu phun zawh vek a ni tawh.

Leiverh (tunnel) 23 awm tur chu verh zawh vek a ni tawh a, a sei ber chu km. 1.733 (metre 1,733) a ni a. Lei dawh tur zawng zawng sei zawng belh khawm chu km. 7 leh metre 27 a ni a, leiverh 23 sei zawng belh khawm chu km. 9 leh metre 9 a ni thung.

Bairabi-Sairang inkarah hian mihring phur rel tlantir tur niin, darkar khata km. 100-a chak thlenga tlantir a ni dawn a, bungraw phur chu darkar khatah km. 65 thlenga chaka tlantir theih a ni dawn.

Sairang atanga Bairabi inkar hi darkar khat chhung vela thleng thei tura ngaih a ni a, Sairang atanga Guwahati chu darkar 16 vela thlen theih tura chhut niin hei hian chawlhhmun hrang hranga din hun chhung tur a huam tel.