Tun kar khan Independent Power Producers Association of India (IPPAI), Zoram Energy Development Agency leh Ministry of Renewable Energy tangkawp te chuan leilung tichereu lo zawnga kawlphetha siam chhuah zirhona an buatsaih a. Hetiang hi a vawi khat awmna a ni hial awm e. He zirhona hian hmasawnna a kawk a, hun lo la awm turah pawh huaihawt thin ni sela. A tak ram a thleng a nih chuan engnge maw chen chu kawlphetha siamchhuahah hmasawnna kan hmuh a beisei awm a ni. Kawlphethaa (electric/ power) intodelh hi ram hmasawn leh hnufual tehna hrawl tak a ni a, a leilung a zirin a siamchhuah dan inang lo mahse a siamchhuak tam thei ram chu ram hausa an ni tho tho thin. Ram ruhrel (infrastructure) a that loh chuan hma a sawn theih loha, ram ruhrel zingah kawlphetha hi a pawimawh ber hial awm e. Lirthei pawh tuialhthei thun a nih loh chuan a tlan thei lo a, hetiang chiah hian ram ruhrel dangte chu kawlphethaah an innghat thui hle a, a tel lo chuan an thang thei theih ngawt bik lo. Kawlphetha siamchhuah hi kan ramah buaipui a nihna a rei tawh a, kan la thleng thui lo hle. Hmarchhak state-ah chuan kawlphetha nei tha pawl kan ni a, khawpui dang nena khaikhin chuan kan chhe lem lo a, hmun dang atanga lakluh a ni thung. Kawlphetha siamchhuah nan ‘tui khawh chakna’ (hydro power) chu kan ramah hman a ni tlangpuia, hetiang siamchhuahna lian tham lo 10 vel a awm a, kan mamawh 1/4 tal pawh a phuhru pha lo. Tunah hian ‘hydro plant’ lian tham 4 buaipui mek a ni a, a hlawhtlin chuan kan hnianghnar bakah hralh chhuah tham a awm dawn a ni. Mithiam te chuan kan ramah hian hydro power hmangin 4500 MW zet a siam theih niin an ngai hial a ni. Ram thenkhatah chuan leilung hausakna (thermal) hmangin kawlphetha an siam a, kan ramah pawh tuialhthei leh gas hmuh a ni tawh a, hengte hi hman tangkai theih an ni bawk. Hetih lai hian kan ban phaka awm ‘hydro’ leh ‘thermal power’ hian sawisel a hlawh mek a, ‘hydro power’ hian ram a duh zaua leilung a ti chereu a, ‘thermal power’ pawhin boruak a ti bawlhhlawh thin a, leilung humhalh duh pawl (environmentalists) te’n an sawiselna a rei tawh a ni. Ni zung chakna, thli leh tawih thei bawlhhlawh (bio gas) atanga kawlphetha siamchhuah chu khawvel intlansiakna chi khat a ni mek a ni. Mihring hian kan chenna lei kan ti chereu nasa a, rei tak chenna tlak a nih theih nan ram tam tak chuan leilung tichhe lo zawnga ‘power’ thar chhuah an hmang mek a, mithiamte’n a dang an dap zel bawk a ni. Leilung hausakna hmangin kawlphetha siamchhuak thei dinhmunah ding mah ila hman zawh theih a nih avangin engtik niah emaw chuan leilung tichhe lo ‘power’ hi kan la hman a ngai tho tho dawn a ni. Khawvel kalphung inthlak danglam zelah ‘clean energy’ hi a thang chak hle a, kan hmabak a ni tho tho a, he lamah hian nasa lehzuala tan lak a ngai a ni. Kum khata Ni zung kan hmuh dan enin engnge maw chen chu ‘solar’ lamah hmasawnna a awm theih a beisei awma, thli chakna pawh thuk zawka zirchiana chhawr tangkai theih a nih a rinawma, tawih thei atanga ‘power’ siam te pawh thil tih theih a ni. Heng te hian kan ramin a mamawh kawlphetha a pe thei lo a nih pawhin ramin a mamawh thenkhat a sutkian theih chuan thil tha tak a ni hrim hrim!