ZALEN April 15, 2026: AMC Corporator hlui Rosiamngheta chuan Aizawl khawpui enkawltu tur AMC Corporator thlan a ni dawn a. Brigade Field-a intual vuak tum ni awm fahrana MNF leh ZPM Party ten thu leh hla an neih tawn mek lai hian Aizawl khawpui enkawl tur thlanna turah Aizawl mipuite hian ngaihtuahna fim tak hmangin vote thlak turin a ngen.

Rosiamngheta chuan Municipal hi mahni ro in rel a ni a, ‘An Institution of Self-Government,’ tiin India Constitution chuan a ziak a 12 Schedule ah phei chuan a hnathawh tur subject list pawh a siam thlap a ni. AMC hi state sawrkar tello in a kal thei tihna anih chu. Municipal Corporation hi sawrkar va thawhpui viau tu Corporation emaw sawrkar va do a ker ngar ngar tu Corporation pawh a ni lo a, State sawrkar tan thingtlang lamah mipui tam tak enkawl tur an awm tho avangin, khawpui chu subject thenkhatah hian lo in enkawl hrang ve rawh se tiin mawhphurhna a pe a, a subject chanah chuan amahin ro a in rel mai tur a ni a, MLA emaw Minister emaw pawhin zuk sawi theih an nei lo, a ti.

Term thum Corporator lo ni tawh chuan Vawk leh Ar vulh khawpna dan an ennawn an tum thu sawiin, "MNF kaihhruai AMC sawrkarin Aizawl khawpui chhunga ran vulh khap tlatna dan a lo siam hi zangkhai zawk leh awmze nei zawka hman anih theih nan kan ennawn dawn a ni. Aizawl khawpui ah hian a veng azirin ran vulh remchanna hmun tam tak a la awm tih Congress party chuan hria in, AMC area-a ran vulh khap burna dan khauh tak hi mipuite tana tangkai turin kan siamtha dawn a ni. Tin, AMC-in ran vulh khap burna dan a pass tak kha ZPM Corporator te motion putluh a ni a. ZPM te motion put luh avanga ran vulh duh chhungkaw tam tak ten harsatna tawk mek kan ni tih hi Aziawl mipuiten kan hriat a tul a ni," a ti.