ZALEN, Sept. 01, 2026: Mizoram Rural Bank LPS Pro Fight-a tel tumin boxer 330 chuangin lehkha an theh lut a, weight hrang panga zingah fly tam berin 90 chuangin Lalrinngheta title kawl lai chhuhsak tumin hming an pe lut.

Tel tur tan inpek luhna hun khar a ni tawh a, fly-ah Rinngheta kawl mek champion kawnghren chhuhsak tumin boxer 94-in lehkha an theh lut a, bantam-ah boxer 74, light-ah 71, welter-ah 60 leh middle-ah champion lai, F Lalthanliana Junior chuan lehkha theh lutin amah nen 26-in hming an pe lut a ni.

Khelh tumna weight tar lang lo 11 awm bawkin Mizoram chhung leh pawn atangin boxer 336-in lehkha an theh lut a. Zirtawpni zingah LPS Arena, Falkland-ah hming pe lutte hriselna endikin an inbuk dawn a, a tlingte hi title chuhin an inhnek thei dawn a ni.

Organising Committee chuan rei tak chhung inbukna hun hawn an tum lo a, chawhma dar 11 velah zawh fel hman an tum a. A huna inlan lo boxer-te nghah an nih dawn loh avangin boxer-te tan inbuk hun ngai pawimawh a ngai dawn hle a ni.

Pro Fight hnuhnung ber, kum 2024 khan champion laite nen boxer 286 an tel a, tun tuma lehkha theh lut hi kum hnih kal taa inhnek aiin 50-in an tam a, weight tinah an tam zawk vek bawk a; mahse, an inbuk zawh hnuah tel tur dik tak a hriat theih dawn chauh a ni.

Weight hrang pangaa champion lai zingah bantam title kawltu, Laldinsanga leh light title kawl mek, Lalkhawngaiha an tel dawn lo va, welter champion Lallawmawma’n title kalsanin lightweight-ah a tir atanga khel turin hming a pe lut.

Champion tawh, C Lalhruaitluanga leh Lalruatzela Hauzel chuan middle title chuhin a tir atangin an khel dawn bawk a, bantam leh light-a champion tawh, HC Lalramfela’n welter title a chuh dawn bawk. 

September 8, kar leh thawhlehni zanah LPS Arena-ah Pro Fight vawi 12-na tan a ni dawn a ni.