ZALEN, November 16, 2025: A tira hun hmang tur leh zai tur ruat lawk zinga tel lo, Youth Icon 2024 Lalsangliana (Taitea) chu mipuite ngenna avangin Leitlangpui Music Festival (LMF) 2025-ah chawpchilh taka koh luh a ni a, a tawp zanah a hla hit tak tak pali nen mipuite a thap leh viau!

Ningani chawhnu atanga Kawmzawl, Pukpui, Lungleia rimawi kûtpui hmanah hian Taitea hi zai tura ruahman lawk a ni lo va. ZALEN-in thu a dawn danin mipuiin an ngen nasat em avangin a huaihawttuten Zirtawpni khan an sawm chawp a, hmanhmawh taka kalin a tawp zan, Inrinni zanah a inlan a ni.

‘Hmangaihna Runthlak’ satu hian chawhnu dar 02:30 velah Aizawl chhuahsanin Lunglei a pan a, a thlen hnu lawkah chawlh pawh chawl hahdam hman mang lovin a zai nghal tih dawhsan atangin a sawi nghe nghe.

Mipui punkhawmna lian bera ruahman lawk bawhpelh leh tlachawpa hun hmangtu tur sawm belh hi a tam lo va, mipuiin Taitea an ngaihhlutzia a lang hle nia a ngaih a nih thu ZALEN chuan thu a dawng.

Taitea hian hla pali a sa a. Gnat Lalrinchhana hla lar, ‘Ngaihzual’ hmanga bul tanin a lar chhuahna tia sawi theih, T-Melody sak lar, ‘Nang lo chuan’ hmanga chhunzawmin T-Melody hla bawk, ‘Thinlung thawnthu’ a sa leh a. A hnu khar nan ‘Hmangaih hmangaih leh Herthuli’ sak zawm a hmang a ni.

LMF 2025-ah hian zai, lâm, hnam leh kut themthiam thil pho chhuah, ei leh in zawrh leh intihhlimna chi hrang bakah band contest a awm a. Mizoram zai thiam lar ber ber inlanin Mizo Idol Season 8 Top 5 atang pawhin Emmanuel Lalremruata, Zomuansanga, Sylvia Malsawmpuii leh Laldinsanga te pawh a tan zanah an zai a ni.