Leiverh hna thawktu Indian 40-te chu darkar 72 chuang zet an hnathawhna hmuna lei minin a khar hnan ta a, thuneituten chhanchhuah tuma beih an nih mek laiin an nunna a derthawng tan em tih hriat a ni lo.

Hmar lam, Uttarakhand-a leiverh hna thawktute hi Pathianni tukah khan leiin a chim hnan a, an tang mek.

State leh sorkar laipui atanga rescue team chuan lak chhuah tumin lei tlate an verh mek a, an la pawh thei lo.

Thuneitute chuan heng mite hi an bepawp thei tih an sawi.

Thuneitute hian chhanchhuah hna an thawh mek a chak zawk theih nan Delhi a\angin leiverhna tha zawk an chah lut tih BBC Hindi hnenah an sawi.

Khawl hi Himalaya tlangdung khua, Uttarkashi-ah hian Indian Air Force-in Nilaini khan an thlen tawh.

Hnathawktute hi leiverh luhka atanga metre 200 vela hlaah tangin tumah hliam tuar an awm lo niin an sawi a. Chhanchhuah hna thawktute hian pipe hmangin ei tur, tui leh oxygen an pe thei bawk.

Hetih mek lai hian engchena rei nge him damin an awm dawn hriat theih a ni rih lo mek a. “Chhanchhuah hna hi nileng zankhuain thawh a ni a. Lak chhuah ngei tumin theihtawp kan chhuah a ni,” tiin thawktu zinga hotu pakhat, Karam Veer Singh chuan BBC Hindi hnenah a sawi.

Thawhlehni khan state sorkar chuan thir pipe, a laia mm 900-a zau hawlhtlang rawlh luh tumin hma an la thar a. He pipe lian hmang hian a tangte hi an chhuah theih an beisei a ni.

Hetih lai hian pipe lian rawlh luh tumna hi a chak lo hle a, lei tlate chu a chhah em avangin a sawt lo hle niin Uttarakhand Director General of Police Ashok Kumar chuan a sawi.

Kumar-a hian chhanchhuah hna hi ‘chawl lovin’ thawh a nih thu leh hmanraw thar a thlen veleh a chak lehzual theih an beisei tih a sawi.

“Tun thleng hi chuan himin kan chhanchhuak ngei ang tih kan ring a, dawhtheih leh rinna erawh neih a la ngai rih a ni,” a ti bawk.

Hetih lai hian hnathawktute chuan Nilaini khan leiverh bulah hian lungawi lohna lantirin thuneitute chu chak zawka che turin an nawr.

Leiverha tang mek chhungte pawhin heng mite hi an zawm ve a. “Leiverhah hian ka kal a, oxygen pipe hmangin ka pa ka bia a. A lo chhuah thuai tur thu min hrilh,” tiin tang zinga mi fapa, Akash chuan a sawi.

Uttarkashi-a chhiatna hi Pathianni zing dar 5:00 vela thleng kha a ni.

A bul lawka lei min avangin leiverh hi a chim phah a. Lei tla hian oxygen lak luhna a titawp vek a. Thuneitute chuan Pathianni zan atang khan walkie-talkie hmangin an bepawp thei tan a ni.

Leiverh hi sorkar laipuiin Uttarakhand-a sakhaw hmun pawimawh hrang hrangte tlawhpawh a awlsam zawk nana a siam a ni a. Tlangram state-ah hian Himalaya tlangdung chhip leh vur ramah te Hindu sakhaw hmun thianghlim tak tak a awm nual a ni.

State Chief Minister Pushkar Singh Dhami chuan national leh state disaster relief team-in chhanchhuah hna hi a huhovin an thawk tih a sawi.

“Thawktute hi an zavaiin an him a, lak chhuah an nih theih nan tih theih ang zawng zawng tih a ni,” tiin a pisa atanga thuchhuahah tar lan a ni.