Aizawl khaw dai maiah pawh hian leivung paih mai maina hmun tur a la awm thluah mai. Hmanni pawh khan World Bank road-ah Durtlang atangin RG stadium panin kan tlan a. Kawng sirah leivung tharlam zet zet hmun 4 laiah an lo paih a. Motor trip khat diat diat an bun ni awm tak a ni.

A chhan ka zawt zeu a, chulai hmun vel chu PWD lamin an thenfai hnu lawkah leivung an lo bun leh tho a lo ni a. Leivung khati taka hnaia an paih ngam mai chhan kha engnge ni ang aw, tiin ka ngaihtuah ta a. Ka rilru a lo lang lian ta ber chu Aizawl khawpui enkawltu AMC an ni.

Thil dik lo a awm hian insawi-fiahna aia kan mamawh chu thil dik lo tihtawp a ni. Chuvangin a mawhphurtu tur ber AMC hian hma a la vat loh chuan kan buaina ngaiah kan la buai zual zel dawn.

Motor lianah vum tak takin leivung an phur a, an tlan chak em em thin te hi a dik lo. An tlanna kawngah an thlauh darh nuai a. Local council leh NGO te pawh hian hetiang kan hmuh chuan man emaw, thuneitute hnenah an motor no nen hrilh a, hrem zel an nih loh chuan thuchhuah leh order vel vang hi chuan kan sim lo tih a lang chiang e.

Tin, a hmun dik loa leivung paih hi khua leh tui tha pangngaiin a tih tur a ni lo. Hetianga leivung kan paih hian kawngpui a titlo lo nghal a ni. Leivung paihtu hi driver an ni zel a, driver chu kawngpuia eizawng, mi dang zawng aia kawng tha mamawh an ni lehnghal.

Mi dangin kawngpui hi an dim lo a nih pawhin driver chu a dim thiam ber tur an ni. Chutiang tur a nih laia driver te berin an duh duhna hmuna leivung an paih zel mai hi AMC chak loh lutuk rah a ni ta ber mai.

AMC hian khauh takin hma la nghal se, hremna pawh na takin lek kawh zel se. LC/ VC tin te thawhpuiin lawmman pawh pe mai rawh se. Hetianga khauh taka hma a lak phawt chuan tu driver mawl ber leh kawng laitu tumahin leivung hi an paih mai mai ngam tawh lo tawp ang. Tunge mahni tana tha lo tih hriat reng ti lui duh ang a, pawisa tam tak chawina tur thil ti zel ngam ang le?

National Highway laihna leivung chu sawi loh Aizawl daiah an la paih zel mai - AMC hian chhiah a lâk phur ang zet hian hna pawh thawk ve rawh se. Leivung leh bawlhhlawh paih ruk titawp thei AMC kan duh, hna an thawh that chuan chhiah pek hi kan hreh bik lo; chhiah kan chhunna AMC hotute training leh eng eng emaw program lama Vai ram chu sawi loh foreign thleng thleng zin reng reng si, leivung leh bawlhhlawh paih ruk mai mai pawh titawp thei lo hi a inhmeh lo viau a ni.

Tun ang zela AMC a in thlahdah a, kawngpui leh kan environment kan duat loh chuan a pawi hnuah kan inchhiar ang a, a mawhphurtu AMC hian dem a la hlawh viau dawn a ni.