Aizawl January 23, 2023: National Student's Union of India Mizoram State President RB Lalmalsawma leh a thawhpuite chuan GAD Aviation Wing atanga Trolley indaih lohna leh zin vei vak bungraw ngah tak tak te'n harsatna an tawh thu an hriat hnuah a hmuna kalin an enfiah a. Trolley chhia a tam hle a, hmantlak 25 chauh a awm niin an sawi. 

RB Lalmalsawma chuan, "Lengpui Airport-a trolley indaih hman tûr a awm loh chhan leh a chhiat nachhan chu Lengpui Airport Renovation ti mektu Contractor te'n Cement leh an hnathawhna hmanraw rit tak tak nawrna atan an hmang thin vang a ni," a ti a. "Congress sawrkar avanga Lengpui Airport din a nih tirhin Arrival leh Departure atan Trolley indaih a awm a, 300 atanga 400 inkar vel a awm thin a ni," a ti bawk.

RB Lalmalsawma chuan, mipui hman tûr indaih awm lo khawpa Contractor, Kamrula te'n Trolley an hmang chhia chu a hriatthiam loh thu sawiin, a ti chhe tu Contractor hian ni 15 chhungin a tira awm zat vel Trolley thar an dah ngei tur a ni, a ti a. Hun tiam chhunga an ti duh lo a nih chuan NSUI (Mz) hian a tawp thlengin hma kan la zel dawn a. Contractor-te chungah engpawh thleng se sawi buai theih a ni lo ang, a ti bawk.

NSUI President chuan, "Congress sawrkar din Lengpui Airport hi kan ngaihlu hle a. Zin veivak te'n nuam ti tak leh hahdam taka bungrua awlsam taka an thiar zung zung theih hi kan duh a. Mipui thlavâng hauhin a tawp thlengin kan tang tlat dawn a ni," a ti a. RB Lalmalsawma chuan, "Mahni pumpui hmangaih lutuk avanga Work Order awm hmaa hna tan tir, a sak that loh êm avanga a sak laia chim Lengpui Airport hi MNF sawrkar hian hei bak hi chuan tih chhiat belh tawh lo se, a changtlunna kawnga theihtawpa hma la ve zawk turin ka ngen a ni," a ti bawk.

Lengpui Airport Renovate mekah a ban khuhna bungraw tha Armstrong Company hman tûr a awm reng laiin a chhe chi Alstrong Company hman a awm niin an hre bawk.