Chi 4-a bawlhhlawh lakkhawm tur khuh hawnna nei

Aizawl: Aizawl Municipal Corporation hmalakna a Aizawl khawpui chhunga in tina bawlhhlawh thliar dan leh lakkhawm dan kalphung thar, '4- Stream Waste Segregation and Door to Door Collection' chu Solid Waste Management Rules, 2025 mila kalpui tan turin September 17, 2026 khan AMC Auditorium, Thuampui-ah tlangzarh a ni.

  UD&PA Minister K.Sapdangachu khuallian niin Chief Secretary Khilli Ram Meena khual zahawm a ni.

  '4- Stream Waste Segregation' ah hian bawlhhlawh hi chi 4 a then hran a ni a. Wet - Bawlhhlawh tawih thei, Dry - tawih thei lo, sawngbawl theih, Sanitary Waste - tawih thei lo, uluk taka fun that ngai leh Special Care Waste - Bawlhhlawh, ram leilung leh mihring hriselna atana hlauhawm te a ni a. Bawlhhlawhte hian a paihna bawm rawng hran vek an nei a. A paihna bawn hran siam a nih bakah, a phurhna, sawngbawl dan leh a paihna hmun pawh a hranpa veka buatsaih tur a ni.

Larsap-in Hindi Ni lawmna a hmanpui

Aizawl : Ram chhung hmun dangte rualin September 14, 2026 khan Mizoramah Hindi Ni (Hindi Diwas) hman a ni a. Greenhill Public School, Aizawl buatsaih Hindi Diwas lawmna puala Hindi Concert, Vanapa Hall-a neih chu Larsap General (Dr) Vijay Kumar Singh, PVSM, AVSM, YSM (Retd) chuan Khuallian niin a hmanpui a, Education Minister Dr. Vanlalthlana chu Khualzahawm a ni.

  Larsap General (Dr) Vijay Kumar Singh chuan Hindi thiam a pawimawh thu leh zirna kawnga danglamna siam a tul thu sawiin, kan hnam ziarang behchhan leh vuan chung zelin inthlak danglamna kan kalpui tur a ni, a nih loh chuan hlawhtlinna a nei thei dawn lo, a ti. Mizoramin talent tha tak tak a neih tam thu sawiin, heng talent-te hi state chhungah chauh a tawp mai loh nan state pawn leh khawvel hmun dang thlenga kan pho chhuah a ngai a, hemi tur hian tawng dang kan zir a pawimawh a ni a ti.

Hindi Diwas Day CM hovin hmang

Aizawl: Chief Minister Lalduhoma chuan Mizoram Hindi Prachar Sabha bultuma Dawrpui Multipurpose Hall-a neih Hindi Diwas Day chu September 14, 2024 khan khuallian niin a hmanpui. Education Minister Dr. Vanlalthlana chu khualzahawm a ni.

  Chief Minister chuan kan culture nen Hindi i thiam ang u. Hindi thiam hi a tha a ni satliah lo, a tulin a tul tawh zawk a. Hindi kan thiam vang emaw thiam duh vang emawa an hnamzia entawn kher kha a tul lem lo. Mizo takin Hindi tawng thiam ila, an hla i sa ang u. Chutianga kan tih loh chuan kan hnamzia kan hloh tial tial ang a, kan sakhua thlengin min hliau thei a ni. Mizote hian kan tawng leh kan culture-te hi tiral lovin kan tilian zel zawk tur a ni.

  Sawrkar laipuiin Hindi a uar tial tial a, Hindi thiam lo tan chuan kan duh leh kan duh loh thilte kan sawi chhuak thei lo fo va. Mi fel tak pawh kha a fel tih a hriat theih loh thin. Chuvang chuan, Hindi hi thangtharten rawn thlahthlam lo vang che u, a ti.

Commonwealth Parliamentary Conference-ah Speaker tel

Aizawl: Kum tina neih thin Commonwealth Parliamentary Conference vawi 69-na, S. Africa khawpui Cape Town-a September 13 atanga vawiin September 20 chhunga neih-ah Mizoram Legislative Assembly Speaker Lalbiakzama a tel.

  He Conference thupui hi "Unity to protect Multilateralism, Observing International Law for Equality and Development in the Commonwealth and Beyond : The Role of Parliaments" tih a ni. Sawiho neih zingah "Artificial Intelligence in Parliament : Current Applications, Prospects and Implementation Strategies" ah Mizoram Speaker hi Lalbiakzama chu Indian Delegates aiawha Lead Speaker tura ruat a ni.

  Commonwealth Parliamentary Association hi tun hmaa British-in a lo awp tawh ram, Parliamentary system hmanga ram rorelna kalpuitute intel khawm niin ram 56 an tel a ni. Kum 2027-ah Conference vawi 70-na chu Ottowa, Canada ah nghah a ni ang.

Mizorama sap missionary hnuhnung ber Rev. Violet pasal Rev. L. Mark a thi

Aizawl: Mara rama sap missionary hnuhnung ber Rev. Violet Louise Anne Mark (Vaili) pasal Rev. L. Mark (97), Mara theologian chu September 16, 2026 tlai khan an chenna Lorrainville, Saikao (Serkawr)-ah a thi.

  Rev. L. Mark hi Lakher Pioneer Mission hnuaia missionary hmasa ber Rev. Reginald Arthur Lorrain-a tunu, Violet Louise Anne Mark nen kum 1968 khan an innei a. Fa pali leh tu thahnem tak an nei. Rev. L. Mark hi Mara a ni a, a nupui Vaili hi Saikao (Serkawr)-ah piang leh seilian a ni a, kum 85 mi niin November ni 13, 2023 khan a thi. 

MADC-ah MDC te MLA emaw MP emaw nih kawp theih loh pass

Aizawl : MADC Emergency Session 2026 chu September 15, 2026 khan MADC Session Hall, Siaha ah neih a ni. He Session-ah hian Mara Autonomous District Council (Constitution, Conduct of Business, etc.) (Seventh Amendment) Rules, 2026 chu lungrual takin member ten an pass.

  MADC-in major provisions of Rule 11 a a tarlan angin tu pawh Member of District Council chu State Legislative Assembly or Parliament nih kawp phal a ni lovang (Among the major provisions passed by the Council is a restriction on dual membership. Under the amended Rule 11, no person Shall simultaneously be a member of the District Council and State Legislative Assembly or Parliament) tih a ni.

Myanmar lam mi kut atangin Meth. tablet sang 5 chuang man

Aizawl : Excise & Narcotics Department leh an thawhpuiten ram pawn lam mi hnen atangin September 16 khan Methamphetamine thahnem tak an man.  

  Excise & Narcotics Department leh 14th Bn. Assam Rifles te thawkdun chuan Zote – Bulfek kawngpui, Champhai District-ah Methamphetamine Kg 5 & gram 500 (Tablet 50,500) leh a neitu nia puh – Kamkimsiang (20) s/o Thangdeihhau, Bukphir khua, Myanmar-a khawsa nia inchhal an man. 

  Methamphetamine vanga man, Kamkimsiang hi The Narcotic Drugs & Psychotropic Substances Act, 1985 (NDPS Act) tlawhchhanin thubuai siamsak a ni.