ZALEN July 21, 2025 : Pathian hla chauhva insawrbing tum tawh, Youth Icon star J Lalrosanga chuan lengzem khawvel thlah nan love song music video pakhat tihchhuah tumin a inbuatsaih mek a, USA atangin a tichhuak dawn.

Tuidam tlangval hian tun hnaiah lengzem kalsana Pathian hla chauh sak a tum tawh thu a sawi a, a khawvel hlui thlahna hla tur hi a la sawi duh chiah lo va; mahse, recording leh shooting an ti zo vek tawh a, YouTube channel-a upload theih reng a ni tawh tih a sawi.

A hla hit tak avanga a fan-ten ‘Fuhchiangtea’ an tih hian hming thar a puh phahna, thla sarih kaltaa ‘Fuh Chiang Lo Maw’ music video a tihchhuah bak kha chu official music video a nei rih lo va, a music video hi maktaduai 4.1 thlirtu a nei tling tawh.

Rsa hian gospel album siam erawh a la sawi ri ngam lo va, tuna a zin mekna, US-a a awm lai ngeia Pathian hla music video pakhat tihchhuah a tum thung a. A hun tur leh a hla erawh sawi chian theih a la nei lo thung.

Youth icon star hian US atanga Mizorama haw hun tur a la sawi chiang thei lo va. September thlaa haw tura inruahmanna awm deuh mah se a la danglam thei reng tih sawiin, “Ka la sawi thei mai lo,” a ti.