Mipui en chak Zote Entertainment film thar Lerlawri (I ngam ngam ka ngam) tihchhuah hun tur a chiang ta - September 13, 2024 (Zirtawpni) zan hian tlangzarh a ni dawn. 

Mizo Film Award 2023-a Best Film Award dawngtu Zote Entertainment te hian kuminah film pahnih an tichhuak tawh a, Lerlawri hi a pathumna tur a ni. Zaithiam leh lemchan thiam ni bawk Vanlalhmangaiha channa 'Two Wheeler Taxi Driver' chu kum tir lam khan an tichhuak a, Hmangaiha hi Serchhip nula Malsawmsangi nen an chang dun a ni. Hemi hnu hian short film 'Tualsumsu' an tichhuak leh bawk a, tunah Lerlawri an rawn chhawpchhuak ve leh thung dawn a ni. 

Lerlawri film-ah hian 'Thaibawih' film atanga mipuiin kan hmelhriat H. Zorampari a inlan dawn a, hei hi mipui en chak chu a ni. H. Zorampari hi 'Thaibawih' film-ah khan Lerlawri lemah a chang a, a thiam zia sawi nawn a ngai lo. Hetiang khawp a hlawhtlin avang hian Zote Entertainment film thar tur pawh hi a hmingah 'Lerlawri' tih a nih phah ta hial!

He film-ah hian lemchan khawvela hriat hlawh tak Nu Machhungi a inlan dawn bawk a, H. Zorampari nen hian an inhmu sakhi vel dawn a nih hmel hle. Hei ngawt pawh hi en chhan tham a nih tawh laiin, Ruthi Chenkual a la awm cheu bawk avangin en hmaih phal chi a ni lo. 

Lerlawri (I ngam ngam ka ngam) official trailer hi September 4, Nilaini zan khan tihchhuah a ni a, Original Sound Track (OST) pawh tihchhuah a lo ni tawh bawk. Lerlawri OST 'Kumtluang' tih hi Zothana leh Zodini te sak niin, August thla khan tihchhuah a lo ni tawh bawk.