Aizawl; Aizawl Municipal Council a Executive Councillor Hmingthanzami chuan, "Licensing Regulations,2012 hi Mizote tan him tawk turah kan ngai a, tuna sumdawng leh tlawmngai pawlte thilphut hi chu kan tan tih hlawhtlin ngaihna a awmlo hrim hrim a ni," a ti. NGO ten license dil tur ten Tribal Certificate an nei ngei tur ani tia an phut chu thil tihchi a ni lo tih Zalen palaiin a kawm naah Executive Councillor Hmingthanzami chuan a sawi a, “India danpui kalhin engmah kan ti thei lo a, chubakah hnam dangte tan kawngkhar kan tum lutukna lamah thil thalo zawk a thleng thei a, tuna kan dan siam hi a himtawkah kan ngai a, tawlh kan tum tawh lo a ni,” a ti bawk. Licensing Regulations,2012 chu sumdawn phalna a ni lo tih sawiin, " helai hmun hi dawr siamna/ sumdawnna hmun atan a hman theih tihna mai a ni a. He dan kan hman avangin hnamdang sumdawng an pun phah dawn lo a. Mizo District Council hunlai atanga hnamdang sumdawn phalna dan lo nei tawh mi 54 te bak chuan an dil thei dawn chuanglo a ni," Hmingthanzami chuan a ti bawk. He dan hnuaiah hian sumdawn phalna dil mi engemaw zat an awm tawh a, heng mite dilna hi endik anih hnuah permit hi pekchhuah nghal zel tum a ni. Hetih lai hian AMC Licensing Regulations, 2012 chu pawl hrang hrang 5- Central YMA, MZP, MSU, MHIP, MUP leh MIMA te chuan an duhlo tih sawiin March 2014 chhung ngeia hnuhkir an phut a, hei hi tih-hlawhtlin anih loh chuan a tul anga hmalak an tum niin an sawi.