ZALEN, March 13, 2025: Karleh Inrinni zana Aizawla Lilzo Second Wave Comeback Concert tur chu ticket zawrh chhuah tan a nih atangin hralh a kal nghal hle.

Mizo rapper hriat hlawh, hun rei tak a tawm bo hnua intuai thar leh mekin Vana Pa Hall-a concert a neih tur ticket hi Nilaini atang zawrh chhuah tan a ni a, lei an thahnem nghal hle.

Lilzo-a lo kir lehna concert-ah hian Mary Dawngi, Zothana, Ngura leh Youth Icon star Kimkima te pawh an zai dawn a. Anmahni hla theuh bakah Lilzo hi hla pakhat theuh an sakpui ang.

Concert hi tunlai social media-a lar tak, Teresa Pachuau-in a kaihruai dawn a ni.

Comeback concert-ah hian mipuite surprise turin hranghlui zaithiam an chawimawi dawn bawk a, Mizoram pum hriat hlawh zai thiam an pho chhuah tur hi an la thup rih thung.

Ticket hi Rs. 500, Rs. 300 leh VIP ticket Rs. 1,000 man awmin Pick n Drop Delivery, Chanmari West, Vaivakawn road, Aizawlah zawrh a ni a, a hmuna lei thei lo tan an deliver thei bawk.