ZALEN December 10, 2023 : Traffic Police chuan Aizawl khawpui chhunga lirthei chet vel dan khawl hmanga thununna, Adaptive Traffic Control System (ATCS) chu enchhin an tum tawh hrih lo.

ATCS hmanga lirthei tlan dan ruahmanna thar hi November 13-15, 2023 chhung khan Aizawl khawpui chhunga hmun pahnih, Bazar Bungkawn leh Bawngkawn, Sairang pengah enchhin a ni a. Chawhma dar 11 atanga hman tan a niin tlai dar 3 thleng enchhin tura tih a ni a; mahse, Bawngkawnah chuan traffic a jam nasat avangin darkar khat chuang deuh hnuah tihtawp leh rih a ni a. Bungkawnah erawh chawhnu dar 1:30 thleng kha chuan tluang taka hman a la ni.

Traffic signal light hi rawng sen (red) a nih chuan lirthei tlan laite chu din tur a ni a, kawngpui vang tan zawnga rawng vara rin ‘Stop’ tih inziahnaah din tur niin kea kal tan kawng a kân theih a. Rawng eng (yellow) a lan chuan ding tura hriattirna tho a ni a, din thut tur tihna erawh a ni lo a, tlan muang nghalin ding tura inpuahchah tur a ni a, zawi muanga din tur a ni a. Rawng hring (green) a lan chuan tlan tur tihna a ni.

ZALEN thudawn danin November 13, 2023 atanga hman chhin Aizawl khawpui chhunga lirthei chet vel dan khawl hmanga thununna, ATCS hman hi a hmangtu mipui leh driver ten an la hriatchian loh avangin ni dang aiin traffic jam a nasa a. Driver zingah light en nachang hre lo an tam bakah mipui pawhin zir tur an la ngah avangin harsatna a awm nasa nia thudawn a ni.

ATCS hi Aizawl Smart City Ltd. hmalaknaa siam a ni.

Traffic Police hotute chuan ATCS chu siam a nih hnuah enchhina a la awm loh avangin enchhin ve hrim hrim a that avangin an enchhin tih an sawi a; mahse, traffic jam a nasat avangin tun dinhmunah chuan an chhunzawm ngam hrih lo tih an sawi.

ZALEN-in a kawmnaah Traffic hotute chuan, “Ni thum kan enchhin chhungin a tir ai chuan a ni thum niah chuan kan ziaawm a. Lirthei chhuah tam hun lai leh lirthei tlan tlem laiah a inan loh em avang leh tuna ATCS enchhinna hmun hi traffic tamna lai a nih bawk avangin harsatna kan tawk nasa a. Hmun dangah chuan nise a ziaawm deuh mai thei a; chuvangin tun dinhmunah chuan enchhin tumna kan nei tawh lem lo a ni,” an ti.