Aizawl : Tunhnai kum 5 (2019-2023) chhung a Traffic Police ten lirthei dan bawhchhia an man hnem ber chu phalloh na hmun a lirthei dah (No Parking) niin, hemi hun chhung vek a lirthei dan bawhchhia man hnem ber chu Two Wheeler an ni.

Home department tarlan danin, kum 2019 atanga kumin 2023 inkar chhung a dan bawhchhiatna tam ber No Parking vang a lirthei man zat chu 14,490 an tling a, signal/thupek ngaipawimawh lo 14,152 zet man an awm bawk.

Report a a lan danin, rui chung a lirthei khalh mi 1,357 man an awm a, driving licence tello/neilo a lirthei khalh 2,756 man an awm. Meizu chung a lirthei khalh man erawh an tam lutuk lo a, 2019-2023 chhungin mi 45 man an awm.

Hengte bakah hian mahni leh midang tana hlauhawm khawp a lirthei khalh mi 416 man awm bawkin, mobile phone hmang chung a lirthei khalh mi 12 an awm. Hengte hi dan bawhchhiatna langsar deuhte an ni.

Kum 2019 atanga 2023 chhung a lirthei dan bawhchhia man tam ber chu Two Wheeler niin, 44,728 zet man an awm a, LMV dan bawhchhia man 14,099 awm bawkin, Taxi 4,035, HMV 2,295, MMV 120, Bus 312, Others 550 man an awm.

Heng kum 5 chhung a lirthei dan bawhchhia man zawng zawngte chawi atanga sum hmuh zat chu Rs. 3,16,65,162 zet a tling.