Transport Minister chuan department hnathawkte leh driving school neitute kokhawmin lirthei chetsualna awm thin a ngaimawh thu leh driving license pek chhuah pawh dik leh khauh taka tih a duh thu a sawi a ni. Lirthei chesual hi tunhnaiah a thleng zing hle a, ‘kan department motor a tel ve lo’ ti lo a minister-in zau tak mai a transport hnathawk leh lirthei khalh zirna sikul neitute he thu a sawipui hi a tha khawp mai a, hei ringawt pawh hi hmasawnna pakhat a ni phawt a. A tak ram a thlen theih phei chuan hmasawnna nasa tak a ni ang. Lirthei chetsual hi khawvel hmun dangah pawh an buaipui thin a ni ngei mai a, a rama zirin a chhan leh a vang a dang thei bawk awm e. Mahse chutih rualin khawi hmunah pawh lirthei chetsualna thlentu chu rui chunga khalh leh thiam bel loh vang a ni tlangpui a, motor khawl dik loh vanga chetsualna chu a tam lo hle. Kan ramah zu khap burna hlih a ni dawn ta a, thenkhat chuan rui chunga motor khalh an pun phah an ring a ni. Rui chunga motor khalh hi midang tana a hlauhawm vang leh a khalhtu tan a him loh avangin dan hmanga khap a ni hrim hrim a, mana hrem theih an ni zawk a, zu hlih leh khapin kori a tu lem lo. Rui chunga motor khalh chingte chungah tunai hian thuneitute lam hian dan lek lehzual sela dan zah nachang an hriat leh zual a beiseiawm. Lirthei han tih hian ke pahnih aia tam a huam a, lirthei hrechiang apiangin a thil tihtheih an hria a, a hlauhawm dan pawh an hrechiang a ni. Tunlaia kan buaipui pakhat chu two wheeler hi a ni a, a bikin rawlthar leh tleirawl zingah a ni bik a ni. Chetsualna tam tak hi ruih vang a nih rualin tlan chak vang a ni bawk a, lirthei dang su miah lo pawha mahnia chesual an tam a, nunna chan phah an awm ta fo mai. TV lamah lirthei intlansiak thalaite’n an tui pui a, hemi anga han chet duhna hian chetsual a hring fo a, TV leh a tak ram hi thil inang lo,, danglam hlak a nihzia hi thalaite hrilhhriat mawlh mawlh a tul a, sawi thaih ila fimkhur nachang an hre mahna. Hmeichhe zingah ‘scooter’ a lar viau a, ‘gear’ thlak ngai lo a ni bawk nen a samkhai viau. Tam tak khalh en hi chuan driving license nei thei tur an ni lo a, mawi leh mawi lo an thliar lo a, an chuh helh a, duh duhnaah an inhnawh a, mi dang tan hnawksak an ni tih hi an inhria em aw? Lirthei dang khalhtute an hawihawm a, chetsualna an la tawk tam lo chauh zawk a ni. Driving school te hian tun aiin an ‘quality’ tih san tum sela, inzirtirnaah an duhtawk hma nia a lan chang a awm lek lek thin a. Lirthei khalha eizawng zinga a tam zawk chu ziak leh chhiar thiam sang an ni lem loa, zirtir an nih laia namnul an nih chuan an zirchhuah hnuah pawisawi lo ti himlotu a ni thei a ni. Sawrkar hian lirthei khalhna sikul te’n an zirlaite tana an hman tur kaihhruaina bu siam sak thei sela, zir hun chhung bithliah ni sela tunai hian kan ‘quality’ hi a san theih a rinawm tlat a ni. Lirthei khalh thiam hian dan zahna a keng tel a, kawng sira chhinchhiahna awmzia hriat a tul a, hawihawmna thlengin a tel a ni. Hengte hi kaihhruaina buah inzirtir ni thei sela, lirthei khalh zirna te pawh a endik zel ni sela hma kan sawn ngei ang. License pe chhuak tute hi tunai hian khirh sela tih hi mi tam tak duhdan a nih a rinawm a, dan ang thlapin kal ta sela mipui lam hian an zo ang em? tih zawhna chhan har tak mai a awm a. License pe chhuaktute dan lekkawh tura kan phut laia a ni lo zawnga nawrtu mipui an nih leh si chuan a dik hauh lo ang. Eng pawh nise ram tan tha tur a nih chuan transport department leh minister hian huaisen takin hma la pawp mai se, mipui fingvar chin chuan an thlawp tho tho a rinawm.