Lirthei a pung zel a, chesual an pung bawk. Kum tinin chetsual laka him nan hapta hman a ni thin a, kar tharah hian hman tum a ni mek bawk.Lirthei chetsual chhan a inang loa, pawlawhna, thiam chian hmaa khalh, ruih nei chunga khalh, khalh chak lutukte, tih palh hrim hrim leh lirthei that tawk loh vangte a ni tlangpui. Lirthei khalhtu thiam loh vang pawhin midangin vanduaina an tawk thin bawk. Mahni fimkhur mah ila midang fimkhur loh luat avangin chhiatna a thleng thin bawk a; hei hian khawlai a ke a kalte pawh a huam a ni. Lirthei neitu, a bikin thalai lamah 'motorcycle' khalh tu zinga tam tak chuan an mawhphurhna an hre lo thina, tlanchak hian mi a ti zauthaua, thalai tha za zek zawk tan chuan thil nuam tak pawh a ni ang. Thawh chhuah nei lo, lirthei chang nilo petrol thlenga chhungte tumsak, chak tak taka tlan thinte hian ngaihsan aiin hmusit an hlawh tawha, a zahthlak zia an hre duh lo a nih pawhin midang pawi khawih thei dinhmunah an dinga, chu chuan sum tam tak chawi leh jail tan thlengin a hril tih tal hi hria sela. Lirthei in a chil/sut hlum te zingah chhung khat eizawngtu an awm thei a, a nghawng a na a, a tuartu chhungte’n an nih tur a nih theih loh phah thei ! Lirthei khalhtute’n an phurh leh midang himna chu an kutah a awm tih an pawm thiam tur a ni. Nu leh pa te pawhin mahni fa te theuh khauh zawka thunun tul chang a awm ang. Kum hnih thum lek chhungin hmeichhe scooter (scooty tia hriat lar) khalh an pung hluai a, motorcycle awm zat nen a inthlau tawh lo viau. Two wheeler siamtu company hian fakna hmangin hmeichhe rilrua awm fo thin 'bet zawk nia inngaihna' an chawk tho thiam em em a; an kutchhuak chu 'zalenna' angin an zuar a, an hlawhtling mek a.A tangkaina bakah 'zalen phah riaua inhriatna’ an lei tel chawk mahna. A bikin, hmeichhe zingah khalh bel hmaa tlanchhuah pui an tam tih a hriat a, ‘road safety’ bul thut an hre loa, ‘driving manners’ an tlachham hle bawk a, lirthei tawt tak kara inzeh hram pawh nihphungah an neih tan chu a ni ta mai e; dimdawihna rilru pu khalhtu dangte’n an hriatthiama, tawhsual an tawh tlem phah chauh zawk tih inhre lo engzah tak awm ang maw? Eng pawh nise a hmei a pain hriat awm chi chu hriat a ngai a, lirthei khaltu dang leh kea kalte himna hi lirthei khalhtu mawhphurhna a ni. Lirthei chetsualna thlentu zingah driving license nei si, khalh thiam tha mang lo an awm nual a, lirthei khalh bel tawh license ti bo te'n a thar an dila rang taka an hmu a nih chuan thil awm lo a ni hran lo. Nawrtu an awm a nih pawhin a diltuin khalh a thiam nal hnua dil leh tura hnawl a fuh ang, vantlang himna hmachhuan a pawimawh hle. Mizoram sawrkar chuan zu zawrh a phal tawh a, hun reiloteah lei theih a ni dawn a. Chetsualna thlentu tam ber chu 'zu' a ni duh chawk. Tunah hian 'mihring taksaa zu awmzat tehna khawl ham chi' traffic police te'n an nei nual tawh a, a tangkai hle tura ngaih a ni. Kum tam tak zu khap burna hnuaia awm tawh Mizo te hian a nghawng tur kan hrethiam lo na chungin zu rui chunga lirthei khalh an awm ngei dawna, a tir lamah an tam mahna. Dan kengkawhtu lamin khauh taka an kenkawh loh chuan 'dan' ngaihzamna a awm duh a, thunun hleihtheih loh dinhmun a thleng thei. Rui chunga lirthei khalh hi intih hmuh theih (behavourial copy) a ni a, tuna an khauh ai mahin traffic lam hi an khauh a ngai a. A tul a nih phawt chuan mi mante chu an hming ti lang si loin, an eizawnna leh thil dangin thliar hrang sela, media kaltlangin mipuiah tidarh bawk sela a tha phian mai thei. Man tawhte’n an nawn tawh loh nan leh ching ve turte pawhin an tih lohna turin inhuam zau a ngai khawp ang.