POLLUTION TEST MIZORAM

Kum 2021 chhungin Aizawlah lirthei khu endik 8,587 awmin chawhrualin ni tin lirthei 33 endik a ni.

Kumin January - July chhungin Aizawlah lirthei 4,420 endik a ni a, chawhrualin ni khatah lirthei 39 endik ang a ni.

August 22 - 30, 2022 chhungin Aizawlah lirthei 4,000 endik a ni a, ni khatah lirthei 500 endik ang a ni.

September, 2022 chhunga Aizawla lirthei khu endik zat - 18,662.

Aizawl: Mizoramah September 1, 2022 atanga  Motor Vehicles (Amendment) Act, 2019 hman a nih vang leh No Tolerance Drive/Checking neih mek a nih vangin lirthei khu endik (pollution test) an tam a, nikum chhungin Aizawlah lirthei khu endik 8,587 an awm laiin, kumin January - September chhunga endik zat chu 24,082 a tling.

Mizoram Pollution Control Board (MPCB) hotute hnen atanga ZALEN thudawn danin traffic police an khauh a piangin lirthei khu endiktir an tam thin a, ni dangah chuan endik tur awm mang loh ni a tam thin.

Kumina MV Act, 2019 hman hma August leh MV Act hman hnu September, 2022 chhungin Aizawlah lirthei 18,662 endik niin Lungleiah 4,466 endik a ni.

Nikum chhung khan Aizawlah lirthei khu endik 8,587 awmin chawhrualin ni tin lirthei 33 endik ang a ni a. Lungleiah 1,161 awmin chawhrualin ni khatah lirthei pali ang vel endik a ni.

Kumin January - July chhungin Aizawlah lirthei 4,420 endik ni bawkin chawhrualin ni khatah lirthei 39 endik ang a ni a, Lungleiah lirthei 688 endik niin ni khatah lirthei panga endik ang a ni.

Hetihlai hian September 1 atanga MV Act, 2019 hman a nih dawn avangin August atangin lirthei khu endik tur an pung a, August 22 - 30, 2022 chhung ringawtin Aizawlah lirthei 4,000 endik a ni a, ni khatah lirthei 500 endik ang a ni.

Hemi hun chhung vek hian Lungleiah lirthei 599 endik ni bawkin ni khatah lirthei 62 endik ang a ni bawk.  

Lirthei khu endikna hmun hi Lunglei bakah, Aizawlah centre pathum, MINECO, Bawngkawn leh Zemabawkah te a awm a, test centre hi ni tin office hun pangngaiah kumtluanin hawn thin a ni.