Lisa solo album 'LALISA' September 10-ah tlangzarh dawn

Admin - Aug 29, 2021

BLACKPINK chuan an official Twitter account-ah Lisa album thar tur hi an tarlang

BLACKPINK member Lisa chuan a vawi khat nan solo album a tichhuak dawn a, September 10-ah tlangzarh a ni ang - a album hming tur hi 'LALISA' tih a ni. 

Thai rapper Lisa hian a debut solo album tur chungchang hi tun hai khan social media lamah a tarlang a, fans lam pawh an phur tawh hle. August 25 khan BLACKPINK chuan an official Twitter account-ah Lisa album thar tur chungchang hi an tarlang ve bawk.

Lisa hi a hming tak chu Lalisa Manoban a ni a, 'Lalisa' tih lai hi a album title atan hian a hmang dawn a ni. BLACKPINK member zinga naupang ber niin, kum 24-na a hmang mek. Album a tichhuah hun tur hi social media kaltlangin a puang a, "MY FIRST SINGLE ALBUM RELEASE 2021.09.10 1 pm (KST)," tiin a tarlang a ni. 

Ama puala album a tichhuah tur chungchang hi YG Entertainment chuan kumin April thla khan an lo puang tawh a, a takin a thleng dawn ta a ni. 

Lisa hi member pali awmna BLACKPINK member zinga solo album tichhuak thei pathumna tur a ni dawn a, Jennie leh Rosé te chuan an mahni pualin album hi an lo tichuak tawh a ni. 

BLACKPINK member Jennie chuan 2018 khan single 'Solo' a lo tichhuak tawh a, a music video hi mi mataduai 650 chuangin an en tawh nghe nghe. An member dang Rosé pawhin March 12, 2021 khan a album hmasa ber 'R' a lo tichhuak tawh bawk a, heta a hla 'On The Ground' phei chu a lar hle a nih kha. April thla khan a single pahnihna 'Gone' chu a tichhuak leh bawk. 

Hetih lai hian an member zinga kum lama upa ber Jisoo erawh Korean drama 'Snowdrop' changtu zingah a tel a, shooting neiin a buai rih hle a ni. 

Share now