ZALEN June 8, 2025: Lunglei Municipal Council chuan kum 2024-2025 chhung khan parking fee atangin Rs. 18,31,349/- an hmu.

LMC Board of Councillors (BoC) chu Zirtawpni khan an Chairman Lalzuithanga kaihhruaiin an thukhawm a, parking fee atanga sum hmuh, BoC-in hmanna tur a ruahman sa Rs. 4,86,275/- bak hmanna atana LMC Traffic & Transport Co-ordination Committee (TTCC)-in a rawtna chu sawiho a ni a.

Tui luan kawr khuhna tha lo siam thatna atan, kawng leh kawng sir kea kalna daidanna pal (railing) rawng hnawihna atan, kawngpui luan chin baka lung phahna atan, kawng kual laia darthalang (convex mirror) dahna atan leh kawng lai cheina leh tilang fiahtu eng (reflector/road stud light) vuahna atan tea hmang tura TTCC rawtna chu BoC chuan an pawmpui a. A tul ang ruahmanna kalpui turin TTCC kutah dahin, khawpui laili deuh leh a tul zual laiah hna thawh tan nise an ti.

BoC chuan The Mizoram Street Vendors (Protection of Livelihood and Street Vending) Regulations, 2017 chu LMC huam chhungah hman turin lungrual takin an pawm tlang a. The Lunglei Municipal Council Licensing Regulations, 2024-in a sawi angin LMC huam chhungah sumdawng reng rengin phalna an neih ngei a ngaih thu leh phalna nei lo sumdawn khap a nih thu tar lan niin, raltlante bik chu phalna hian a huam loh thu leh dawr luah leh khawlaia sumdawn nan pawh phalna pek theih an nih loh thu tar lan a ni a.

Hemi chungchangah hian tuna dan pawm tak hmang hian fel taka hma lakna kalpui tura rel niin, a tul anga lo bawhzui turin LMC Chief Executive Officer (CEO) Donny Lalruatsanga ruat a ni.