March 19, 2024; Vanlalhriatpuia (25) s/o Chawngliankhuma (L), Darlawn Venghlun chu a lo halna ah a kanghlum a, nimin (18.3.24) khan vui liam a ni.

ZALEN thudawn danin, karliam ta Zirtawpni, March ni 15 khan Vanlalhriatpuia leh a thiante pahnih chu lo hal turin an kal a, lo a hal zawh hnua a thiante nen sangha man nghal tura inthurual an ni.

Inngahna hmun tur an sawiah a thawmhnaw leh a phone te pawh a dah a, a hmunhma luidung te hre sa a nih avangin ngaihthat lohna an nei lo a, a rei deuh avangin lui lam an pan san a, lui lamah pawh an hmu lo a, in lamah a haw a ni ang tih rin dan an nei zui a ni.

Ram an riahna atanga an haw hnu, tun Pathianni dar 3 bawr vel a a thawmhnaw leh a phone te in a an va pekna-ah in a la thleng lo tih an hria a, hemi hnu hian chhung khat laina ten a chanchin an ngaihven nghal a ni.

Lam kal hmasa ten tlai dar 5 bawr velah lo an neihna hmun an thleng a, a lo halna atanga a thlang deuh lawk luikawrah bawkkhup zawngin an hmu a, a hmai leh a dar leh a ban te a kang a, a taksa pawh a lo chhe deuh hman tawh a ni.

A ruang an hmuh atangin YMA te a hmunah kal nghalin, a tul ang leh buaipui ngaite an buaipui a, dar 9:10 bawr velah an chenna in an thlenpui.

Vanlalhriatpuia hi a nu ho a khawsa an ni a, vanduaina a tawhna hmun hi khua atanga km 20-25 bawr vel niin, Pathianni zan khan lumen a ni a, nimin khan vui liam a ni.