Mizoram in a tum sarihna atana a kalpui mek Lockdown 7 leh a hmalama kan inthunun dan hi a tha thawkhat viau a, state tam zawk te ngaihtuahin kan inkhuahkhirh tha viau ni pawhin a lang. Heti a nih rual hian kan lockdown inthunun dan erawh hi chu her rem deuh a tul niin a lang a, khawpui kan inthunun a tul viau lai hian thingtlang lam inkaihhruaina hi chu thlahdul deuh emaw her rem deuh hi chu a ngai ta niin a lang.

Tuna Lockdown kan neih mek hi Thawhlehni hian a tawp dawn a, Chief Minister hovin hemi chung-changa kal zel dan tur hi ngaihtuah a ni dawn a, eng ang ruahmanna nge an neih dawn tih erawh hriat a la ni lo.

Tuna kan kalphungah hi chuan phai lam atangin nitin kan khawsaknaa kan mamawh bakah bungrua a lut reng a, phai lam chawhmeh pawh a awm reng. Chutihlaiin thingtlang lam atanga kan mamawh erawh chawkluh a awlai lo hle a, an veivahna ber Sumo service a awm hleih theih loh avang leh an thlai thar te an hralhna thin Bazar-a inzuar te an inhawn theih loh avangin an sum hmuh tur tam tak an hloh phah. Mahni kawtkaia inzuar ten harsa takin chawhmeh an lalut a, to tak taka an hralh a ngaih a vang in a tuartu chu kuthnathawktute leh mipui bawk kan ni.

Covid-19 hripui vangin he dinhmunah hian kan ding mek a, chutihrualin kan inkhuahkhirh dan erawh tul lo chin hi a awm em a tih theih a, mipui harsatna siam zawng hian inkaihhruaina dan hi kan siam ni te pawh hian a lang. Feh chhuah hun kan siam rualin office kal hun erawh kan siamsak lem lo te hi a mak a, mahni thu thua awm thei tur zawk te tana dan kan zam ruala thuneihna hnuaia awm sa te zalenna kan pe thui lutuk hi hriatthiam a har. Lirthei lek chhuah dan kalphungah pawh mipui tan harsatna tam tak a siam a tih loh theih loh.

Chutihrualin mipui lam pawh kan dik vek chuang lo a, tul lovah kan inhambuai kual a, thuneitute tana dan khauh tak zam loh theih loh a nihna lai pawh a awm a, hei hian harsatna min thlen leh ta si a ni. Kan inkhuahkhirh danah erawh kan economic in tawrh loh dan erawh kan ngaihtuah a ngai a, a bik takin thingtlang lam tan hei hi a pawimawh a ni.