Aizawl; Hripui leng vanga Total lockdown puanna hnuaiah Taxation department chhiah hmuh a tlakhniam phah lutuk lo a, kum kal mek 2021-22 (April-July) chhungin chhiah chi hrang hrang Rs. 2,71,62,77,977 an hmu tawh a, hetihlai hian kum kal ta 2020-21, April-July a chhiah hmuh chu Rs. 1,66,11,86,314 a ni.

Kailiana Ralte, Commissioner of State Tax chuan chhiah lak kawngah a theih ang angin tan an la tih ZALEN hrilhin, Tax return file lote reminder pein, office lamah pawh an puih bakah, Tax return file lo te an dapchhuak reng niin a sawi.

Taxation department chuan kum kal mek, April thla ah Rs. 93,04,70,699 chhiah hmuin, May ah Rs. 32,94,31,107, June ah Rs. 75,71,16,919 leh July ah Rs. 69,92,59,252 a hmu a, kumin 2021-22 a chhiah hmuh tur ruahman lawk zat chu Rs. 6,50,00,00,000 a ni.
    Kum kal ta 2020-21 ah khan chhiah hmuh tura Taxation department in a ruahman zat chu Rs. 6,00,00,00,000 a ni a, hmuh zawng zawng erawh Rs. 6,77,83,53,824 niin, target khumna Rs.77,83,53,824 a tling. Kum 2019-20 chhung khan Rs.6,67,28,72,503 an lo hmu tawh bawk.

Kum kal ta chhung khan Covid 19 hripui leng vanga harsatna hrang hrang thleng vangin Taxation department in chhiah a hmuh thin ang te a hmu pha lo a, April ah phei chuan Rs.14,35,16,224 chiah an hmu pha a, kumin April a an hmuh erawh Rs. 93,04,70,699 a tling.

Kum 2020-21, April atanga July thleng a Taxation department in chhiah a hmuh Rs. 1,66,11,86,314 chu, kumin April atanga July thleng a chhiah hmuh Rs. 2,70,70,18,725 aiin Rs. 1,05,50,91,6632 in a tlem zawk.