Aizawl; Covid 19 thawh hnihna vanga Mizoram hmun hran hrana lockdown khauh zawka puan a nih atanga hapta hnih chhungin mi 10,481 in hripui an kai a. July ni 18 a inkhuahkhirh puan atanga hapta 2 chhunga hri kai zat case hian June thla pum kai zat 8,093 chu case 2,388 zetin a khum a ni.  

Total lockdown puan July ni 18 atanga July ni 30 (Zirtawpni) thlenga chhiarin hripui kai thar 10,481 positivity rate chu 10.31% lai a ni a. Hetih lai hian India rampuma hrikai thar kar khat chhunga positivity rate chawhrual chu Economic Times in a tarlan danin 2.43% chauh a ni thung.

ISDP in result a tichhchhuah ZALEN in a khaikhawmnaa a lan dan chuan ram pawn atanga hripui pu lut mi 65 chauh (0.62%) an nih laiin tualchhunga inkaidarh zat chu 10,416 (99.37%) a ni thung a. Tualchhunga kai mi 10,416 zinga 4,846 chu kaina hriat loh an ni bawk a ni.  Mi 4,529 (43.21%) dama chhuahtir an ni.

Nitina test neih pangngaiah hian RTPCR, Truenat leh Ragt test sample 60,546 lak hman a ni bawk a, mass testing ah mi 40,156 test hman an ni bawk a ni.