DOWNLOAD OUR APP

Read latest news on your phone
app-store

Lockdown puan hun

May 08, 2021

Lockdown puan hun

Hripui avangin nikum March 22-ah Janata curfew puan a ni a, a tuk March 23, 2020 atangin Mizoram chu lockdown tan a ni a. India ram state zinga lockdown puang hmasa ber kan niin India ram pumah March 25 atangin lockdown puan a ni ve leh a ni.

Hun engemaw chen lockdown anih hnuah phelh a ni a, ni 20.4.2021 zing dar 4 atanga 26.4.21 zing dar 4 thleng Mizoram pumah inkhuahkhirhna kalpui tan leh a ni a. Inkharkhip hun hmasa lamah hian inkaichhawnna chu chhutchah a nih loh avangin May 3 thleng pawhsei leh a ni a. 

Mahse hei pawh hian awmzia a neih thui loh em avangin sawrkar chuan khauh lehzuala kenkawh turin May 4-11, 2021 chhung atan inkhuahkhirhna dan thar a duang leh ta a ni.

May 4 atanga inkharkhip neih tanah hi chuan duty-te pawhin uluk lehzualin veivak te an endik a, mipui lam pawh pawn chhuak an tlem hle. Hetih chhung hian hri kaina hi chhutchah tumin thehtawp chhuah a ni a; mahse, hmasawnna a awm loh avang leh hrikai hmuh chhuah an pun zel avangin May 17 thleng total lockdown puan leh a ni.

Aizawla chawhmeh zuar pakhat chuan inkharkhip chu a thlawp rualin mipuiah hriattir lawk lova puan thut a ni thin chu tha lo a tih thu a sawi a. “Sawrkarin April 19 zan khan inkharkhip a ni dawn tih a puang thut a, a puan hun lah hi zanrei tawh, mut hnu a ni a. Chawhmeh zawrh tur tam tak kan lo order lawk tawh a, inbuatsaihna hun awm lova hetia tih thut a ni hi chu a fuh lo khawpin ka hria,” a ti. 

Dawr kai pakhat pawhin, “State dangah chuan lockdown hi neih a nih dawn chuan media hmangin mipuiah puandarh hmasak a ni thin a. Kan state-ah erawh chuan chanchinbu leh electronic media-te tihdarh hman tawh loh, zan reiah te puan a ni chauh a. Mi tam takin kan hre lo thin a, keini pawhin kan mamawh te lo lak lawkna hun pawh kan nei thin lo hi chu a fuh lo ka ti a. Hri kaidarh zel venna atana inkharkhip hi kan thlawp viau laiin mipui hriattir lawkna awm lova chawpchilh taka tih thin a ni erawh a fuh lo hle in ka hria,” a ti ve bawk.

Share now