KOHHRAN HRUAITU TEN INKHARKHIP VANGA SUM LUT A TLEM CHHAN NIA AN SAWI TE CHU..

1. Hnathawh theih loh avangin sum thawhchhuah a tlem a, hei hian thawhlawm a nghawng

2. Inkhawm a theih loh avangin thawhlawm lakkhawm theih a ni lo

3. Inkharkhip vangin ip chi hrang hrang lak/khawn a remchang lo

4. Tualchhung kohhran ten mahni khua/veng ah tanpuina an sem nasat avangin hmunpui lamah sum lut a tlem phah

Aizawl : Aizawl: Covid-19 hripui vanga inkharkhip anih avangin Mizorama kohhran hrang hrang te sum hmuh thin chu a hniam vek a. hetih lai hian sum hmuh tlem vanga buaina tawh erawh an la awm lo thung.

ZALEN in kohhran hrang hrang hruaitute a biakna ah April,2021 atanga inkharkhip puan anih avangin kum danga an sum hmuh ang an hmu phak lo vek tih an sawi a. Hetih rual hian sum lakluh a tlem avanga buaina tawk erawh an l awm lova, mahse inkharkhip hi puan chhunzawm zel anih chuan harsatna tawk thei an ni tih an sawi. 

Mizorama kohhran lianber Presbyterian Church of India, Mizoram Synod a Senior Executive Secretary Rev. B.Sangthanga chuan nikum April-August nen khaikhinin kumin hemi hun chhung (April-August) a sum an hmuh chu vaibelchhe 14 velin a tlem zawk niin a sawi a. (Tun dinhmunah chuan nikum lam hi kan phak lo deuh a, mahse kohhran thenkhat atanga lut remchang lo a la awm avangin kan hmuh zat tur chiah hi a la hriat loh a. Lut kim ta se chuan nikum lam hi kan phak thuak ang em aw kan ti a. Inkharkhip hi chuan nghawng a nei tih a lang a ni," a ti. 

Baptist Church of Mizorama AGS i/c Service Rev. R.Lalbiakliana chuan, "Nikum April-August kan phaklohna hi 4.97% a ni a, a pawisa ang zawng chuan nuai 387 velin nikum kan phak lo a. Lockdown hi chuan thui takin min nghawng a ni," a ti. Maj. K.Vanlalsawm-thanga, Territorial Financial Secretary, India Eastern Territory pawhin lockdown chuan a nghawng niin a sawi a. "Nikum aia kumina sum kan hmuh tlemna hi 25% vel niin kan hria," a ti a. 7th Day Adventist a Executive Secretary Rev. Lalnilawma Colney pawhin lockdown chuan nasa takin sum hmuh kawngah a nghawng niin a sawi a. UPC of Mizoram hruaitu Rev. C.Lalremsanga pawhin lockdown avangin an sum hmuh thin chu nasa takin a tlahniam nia sawiin, "Kumin kumtawp ah hian kan budget hi kan tlin dawn leh dawn loh a la hriat loh a ni," a ti bawk.

Kohhran hrang hrang te sum hmuh thin hi tlahniam mahse rawngbawlna kawngah erawh chuan harsatna lian tawk an la awm lo niin kohhran hrang hrang hruaitute chuan ZALEN an hrilh a. Synod Sr. Executive Secretary Rev. B.Sang-thanga chuan, "Sum lakluh a tlem avang hian tun dinhmunah chuan harsatna kan la tawk lemlo a, mahse kan hmalam hun hriat a nih loh avangin inrenchem zawnga kal nise kan ti a. Hmun hma to taka lei, hna nghet lak leh insumtheihna hrang hrangah te chuan insum hrih nise kan ti a ni," a ti.

BCM hotu Rev. R.Lalbiakliana chuan, "Thawktute hlawh pek kawngah chuan harsatna kan la nei lo a. Mahse hna lak tur erawh insum hrih nise kan ti a ni," a ti a. Maj. K.Vanlalsawmthanga chuan harsatna an la tawk lemlo nia sawiin, "Hlawh pek kawngah chuan kum 2 pawh in kharkhip ila kan la buai chuang lovin kan ring a, mahse kum 2 a pelh erawh chuan kan harsa tawhin a rinawm," a ti. SDA hotu Rev. Lalnilawma Colney chuan harsa takin an la kal tawk tawk niin a sawi a, "School ah fee tihniam anih avangin hlawh kan inpe tha hleithei tawh lo a, kan buai tan khawp mai. A dang hi chu kan la kal tawk tawk a ni," a ti. Rev. C.Lalremsanga UPC of Mizoram chuan sum lut chhe mah se, an kal pangngai chu a ti bahlah lemlo niin a sawi bawk.