Lok Sabha Election 2024 chu April 19 atang hian thawh sarihin neih a ni dawn a, thawh hnuhnung ber chu June, 2024-ah neih a ni ang a, June 4-ah a rualin vote tlate chhiar a ni ang a, Mizoram chu thawh hmasa berah vote thlak a ni ang.

Naktuk March 20 hian Gazette notification tihchhuah a ni ang a, March 27 thleng nomination thehluh theih a ni ang a, March 28-ah scrutiny neih a ni ang a, March 30 thleng inhnuhdawhna hun hawn a ni a, June 4-ah vote chhiar a ni ang a, June 6-ah Inthlan kaihnawih thil buaipui hun khar a ni ang.

Election Commission of India (ECI) chuan Inrinni chawhnu khan Delhi-ah Lok Sabha inthlan tur hi a puang a. Bye-election, assembly leh Lok Sabha inthlanpuia vote chhiar zawng zawng chu June 4-a zawh turin tih a ni.

Tuna sorkar laipui term kal mek on June 16-ah a tawp dawn a ni.

Mizoram hi thawh hmasa berah inthlan tur a ni dawn a, Mizoram inthlan rual hian state dang 20-a Lok Sabha bial 101-ah inthlan a ni bawk ang a. Arunachal Pradesh leh Sikkim-ah assembly inthlan a awm bawk ang.

Inthlan thawh hnihna hi April 26, 2024-ah neih a ni ang a, state 13-a bial 89-ah inthlan a ni ang.

Thawh thumna chu May 7, 2024-ah neih niin state 12-a bial 94-ah vote thlak a ni ang a. Thawh lina chu May 13, 2024-ah state 10-a bial 96-ah neih a ni ang.

Inthlan thawh ngana chu May 20, 2024-ah state pariata bial 49-ah neih a ni ang a. Thawh rukna chu May 25-ah state sariha bial 57-ah neih a ni ang a. Thawh sarihna chu June 1, 2024-ah state pariata bial 57-ah neih a ni bawk ang.

Inthlan puangtu, Chief Election Commissioner Rajiv Kumar chuan tun inthlanah hian mi vaibelchhe 96.8-in vote an thlak dawn a, polling station nuai 12 chuang siam a ni tih a sawi.

Lok Sabha inthlan hnuhnung ber, kum 2019 khan BJP-in bial 303 zet lain Congress-in bial 52 chauh an la a. BJP kaihhruai NDA chuan hneh taka sorkar an siam a, tun inthlanah pawh hian bial 300 chuang lak leh an inbeisei.