ZALEN December 17, 2023 : March 11, 2019-a Mizoram larsapin chairman a lak luh hnua a taka hna thawk tan, Mizoram Lokayukta chuan vawiin thlengin eiruk thubuai chhui tur 53 a dawng tawh a, kuminah thubuai chhui tur paruk a dawng tawh.

Lokayukta tar lan danin vawiin thlenga thubuai chhui tur a dawn tawh 53 zinga 21 chu titawpin regular investigation 19 neih mek a ni.

Thubuai 37-ah chhui chianna hmasa/preliminary enquiry (PE) neih tawh a ni a, PE report 28 dawng tawhin PE la tihfel loh (pending) pakua a awm a, thubuai panga chu PE neih hmaa chin fel a ni.

Kumin chhungin Mizoram Lokayukta-ah thubuai paruk a dawng tawh a, chungte chu -Local Administration Department, Chakma Autonomous District Council (CADC) chungchang te, Green India Mission fund hman dik lohna awm nia tarlan chungchang te, Aizawl South I chhunga SASCE scheme fund hman dik lohna awm nia ngaih chungchang te, Congress thalaite thehluh, sawrkar sum Rs. Nuai 100 ziah bo chungchang leh Reiek Tourist Resort siamnaa fund hman dik lohna nia tarlan chungchangte bakah, Meidum - Hortoki kawng siamna a sawrkar sum hman dik loh chungchangte a ni.

Hetihlai hian Mizoram Lokayukta hian thubuai chhuitu tur, investigation wing hran a la nei lo a, prosecution wing-ah erawh thawktu an nei tawh thung.