Aizawl March 18, 2024 : Larsap Dr. Haribabu Kambhampati chuan vawiin tlai khan Raj Bhawan Durbar Hall-ah Lokayukta Chairperson thar atan Lalmalsawma, IAS (Rtd.) a la lut.

Mizoram Sawrkarin Chairperson Lokayukta atana a ruatna lehkha chu Chief Secretary Dr. Renu Sharma in a chhiar chhuah hnuin, Larsap chuan rinawmna thu tiamtirin Lalmalsawma chu a la lut a ni.

Vawiin lakluhna inkhawmah hian Chief Minister Lalduhoma, Speaker Lalbiakzama bakah Minister leh sawrkar hotulu pawi mawh an tel bawk a ni.

Lalmalsawma hi March 1st 1958 -ah Gaya khua, Bihar-ah a piang a. August ,1983 khan Indian Administrative Service (IAS)-ah inziak tlingin AGMUT (Arunachal Pradesh. Goa, Mizoram,Union Territories) cadre chu a zawm a. Sawrkar laipuiah leh Delhi, Goa leh Mizoram sawrkara department hrang hrangah hna pawimawh tak tak hneh takin a chelh thin a; Finance, Education, Health, SC/ST/OBC welfare leh DP&AR, GAD leh a dang-ah hna hrang hrang a chelh tawh thin.

Sawrkar laipuiin Director, Minsitry of Human Resource Development-ah kum 1996-2000 khan an ruat a. Hna pawimawh tam tak a chelhte zingah Chief Electoral Officer, Mizoram mawh phurhna kum 8 chuang a chelh. He hna a chelh lai hian Delimitaion of Assembly Constituency Mizoram 2005 khan theih tawp chhuah in hma a la. Ramchhung mai ni lo international level-ah Election Observer-ah ruat a ni a, kum 2015 January khan Palestine election-ah India ram atanga observer pali thlan zingah a tel.

Lalmalsawma hian Mizoram Chief Secretary hna November 1, 2014 atanga February 28, 2018 thleng a thawk. MZP te’n kum 2015 khan sawrkar hna thawk ei ru lovah an thlang. Sawrkar tan kum 35 a thawh hnuin, February 28, 2018 khan IAS atangin a chawl ta a ni.