Aizawl March 12, 2024 : Mahindra XUV3OO LPS Cup quarterfinal hnuhnung berah Ramhlun South leh Vaivakawn intawngin, Zirtawpni zan dar 8 atangin Rajiv Gandhi Stadium, Mualpui-ah an inkhel dawn.

He inkhel turah hian Ramhlun South captain Lalrohlua Sailo chuan, "Kan kawr awmah arsi pathum a awm a, pali awmtir ngei kan tum a ni. Tuna kan dinhmunah kan tha tawk a, player kan neih belh (Malsawmfela) a nih pawhin kan that ngaiin kan tha reng tho ang," a ti.

Vaivakawn captain David Lalrinpuia pawhin, "Kan hlauthawng lo va, player langsar nei lo mah ila theihtawpin kan bei a. Kan coach-in kan player-te theihna tha takin a hmang thei a, team boruak tha tak nen kan khelh avangin Ramhlun South tan khirh ve tak kan ni ang," a ti ve bawk.

Ramhlun South tan Aizawl District Football Association buatsaih inter village football a hlu a, tournament hmasa ber 2013 leh a dawttu 2014-ah champion zawnin 2015-ah final an lut leh a, vawi thum champion zawn an tumna Armed Vengin an dang.

2018 khan trophy la kir lehin tournament hnuhnung ber 2019 semifinal-ah Republic an hneh lo va, kum nga hnuah champion tumin an kir leh mek a, quarterfinal-ah team tha leh hriam zawk entir theih an inbeisei sang.

Round of 16-ah awlsam takin Bethlehem an hneh a, Valalthlamuana'n tum hnih pet lutin Lalremruata, Danny Zorammawia leh JH Remlala'n an khung bawk a, 5-0-in an chak. Ramhlun South hi YMA football-ah vawi hnih champion tawh bawkin khua leh veng inelnaah Armed Veng ang bawka sulhnu nei lian an ni.

Tun hmaa team tha leh football thiam veng tia hriat hlawh thin Vaivakawn tan kawng hrang hrangin fiahna a tling dawn a. An that vanglaiin YMA football-ah final aia sang an thleng zo lo va, kum eng emaw zat sawi lansarh an nih tawh loh hnuah kawng an sial thar leh mek.

Round of 16-ah Lalruatkima Dosel chuan rang takin thun mah se, Kulikawnin an si phurh an sut ve leh a, Benjamin Lalnunpuia'n hun tawp dawnah 2-1-a an chak nan a pet lut. Vaivakawn tan rahbi pawimawh a ni a, team thawh hona hmachhuanin an hmabak hlen turin an inpeih.

Tournament kal meka vawi thum ve ve an khelh tawhah Vaivakawn leh Ramhlun South-in goal 12 ve ve an thun a, mi mala khung tam ber zinga tel Benjamin-an Vaivakawn tan goal nga thun tawhin Ramhlun South tan Thlamuana leh Danny-an goal thum ve ve an khung a ni.