ZALEN, Feb. 21, 2025: Mizorama TV reality show hrang hrang hlawhtling taka lo buatsaih tawh thin, LPS Vision Production chuan kumin chhungin talent hrang hrang neite mipui hmaa an inpho chhuahna tur, The Hunt (Talent Show) a buatsaih dawn.

LPS Vision hian kumina reality show chi hrang hrang buatsaih a tum zingah talent chi hrang hrang haichhuahna tur, The Hunt chu telin hetah hian zai te, rimawi te, fiamthu, magic show leh thil chi hrang hranga thiamna neite an inlan thei dawn a ni.

The Hunt an buatsaih tur thu hi puang tawh mah se show neih dan tur kimchang, a neih hun turte erawh a la puang chiang lo thung a. Mizo thalai talent nei tha tak takte inlan tur hian a lo inbuatsaih lawk theih a ni.

LPS Vision Production hian reality show chi hrang hrang - Youth Icon, Pro Fight, Pro Volleyball leh thil dangte hlawhtling takin a lo buatsaih tawh thin a. Nikuma Youth Icon a buatsaih phei chu a boruak a lian hle a, kum a thar hnuah pawh tun thleng Youth Icon star-te chu social media-a mite thlir ber a la ni zel a ni.