Zoram mipuiin a chanchin kan ngaihven em em Zomuanpuia Tlau (ZMP Tlau) chu LPS Pro Fight-ah kan hmu dawn - a va phurawm tawh si em! ZMP Tlau hian tel turin form a theh lut tawh a, inbuatsaihna pawh a kalpui tan der tawh. 

ZALEN chuan ZMP Tlau hi kan be pawp nghal a, a phur tawh thu leh a inbuatsaih nasat thu kan dawng. Kum 50 mi hian Pro Fight-ah Kolasib hming tih that a tum dawn a, a thei ang em tih chu a hriat thuai dawn e. 

Tel duh chhan...
ZMP Tlau chuan zuk leh hmuam a tih nasat thu sawiin, "Ni khatah cigarette bawm 5/10 te ka zu thin a, zuk tlem ka duh hle. Tunah chuan inbuatsaihna ka kalpui a, cigarette pawh bawm 1 chauh te ka zu tawh," tiin a hlawkpui nghal der thu a sawi. 

LPS Pro Fight-a a tel chhan bulpui ber chu taksa hriselna (fitness) a ngaipawimawh vang a nih thu ZALEN a hrilh a, chumi tur chuan theih tawp a chhuah tih a sawi nghal bawk. Pro Fight atan hian in lamah ama thiam ang angin a practise tih sawiin, "Ka zam bik lo, YouTube atang pawhin a inzir theih," tiin a tawng chher chher mai!

One Fight Night-ah 
ZMP Tlau hian LPS leh 3:16 Plan Solution ten One Fight Night an buatsaih turah a inhnek dawn tih ZALEN a hrilh bawk a, a hnekpui tur erawh tihchian a la ni lo thung. He fight atan hian Sete Boxing Academy-ah coaching kal a tum a, a theihna Zoram mipui hmuh tir a tum hle. 

ZMP Tlau chuan, "Sap ho chu kum 100 an nih pawhin an la tar lo a, Mizote chu kum 60-ah kan tar nghal mai zel. Kan kum a tam a nih pawhin kan chak telh tel zawk tur a ni," tiin a sawi bawk.