Aizawl March 18, 2024 : Lalfakzuala (Faktea) Kum 12 s/o T. Lalchhuanmawia, Ruallung boral danah thil fel lo leh dik lo awm nia hriat a nih avangin Ruallung VC leh All NGO chuan thuchhuah an siam a, an beisei ang hmalakna an hmu lo a nih chuan a tul angin hma lak zel an tum.

Lalfakzuala (Faktea) hi Ni.11.03.2024 (Thawhtanni)-ah School chawlh lai remchanga lain a pa in-Check-up tur Aizawl-ah a nu nen an kalpui a. Hemi ni tlai lam hian a remchan em avangin ENT Specialist-ah Check-up a ni a, ENT Doctor hian a Tonsil zai a ngaih thu a lo hrilh a, School chawlh laia intihfel hman an duh si a. Ni.12.03.2024 (Thawhlehni)-ah LRM Doctor an rawn leh a, a tuk Ni 13.03.2024 (Nilaini)-ah zai theih a nih tur thuin an lo chhang a ni.

Ni.12.03.2024 (Thawhlehni) zanah Thenzawl leh Sihphir Venghlun inkhel enin Faktea leh a Patea hi Zuangtui atangin Rajiv Gandhi Stadium, Mualpuiah hlim takin an kal a. Tichuan, Ni 13.03.2024 (Nilaini) Dar 10:00 A.M-ah LRM Hospital-ah Tonsil zai turin Admit a ni a, hetih lai hian a taksaah damlohna leh harsatna a nei lo a, amah buaipuitu Hospital Staff te pawh hlim takin a la kawm mai bakah a nu leh pa te nen infiamin “Hnimhlum hi i zo lo ang a, i rawn harh chhuak zo lo mai ang a'” an tih fiam pawhin nui sangin “A pawilo, Vanramah ka kal daih ang a, a nuam daih zawk ang” tiin hlim taka chhangin Operation Theatre- ah Dar 3:24 P.M-ah an nawr lut ta a ni.

Dar 4:37 P.M-ah a dinhmun a that loh thu a chhungte an rawn hrilh a, hemi rual hian eng mah awmzia a awm tawh loh thu an sawi tel bawk a ni. Tichuan, Dar 6:27 P.M - ah a nu leh pa koh an ni a, ICU–ah dah luh a nih tur thu an hrilh a, OT Room atanga ICU–a an dah luh dawn hian amah mita hmutute chuan a boral tawh ni ngeiin an hmu a ni. Tichuan, Dar 6:34 P.M-ah ICU-ah an nawrlut a, ICU-a hun rei vak lo a awm hnu Dar 6:45 P.M-ah ICU-ah a nu leh pa te ko lutin a thih thu hrilh an ni ta a ni.

Faktea thih chhanah hian LRM Hospital chuan Malignant Hyperthermia niin an sawi a; mahse, Ruallung VC leh All NGO – te chuan a thih chhan nia an sawi hi pawm har an tiin hriatthiam a har an ti a, chuvangin en liam an tum lo a, an beisei ang hmalakna an hmu lo a nih chuan a tul angin hma lak zel an tum.

Hetiang vanduaina hi tu chungah mah thleng tawh lo se ; Faktea thihna hian rah tha zawk a chhuah ngei theih nan theihtawpa hma lak zel an tum thu an sawi bawk.