Aizawl May 20, 2024 : Special Judge, Prevention of Corruption Act Dr. HTC Lalrinchhana chuan Dt. 20-05-2024 hian section 420/468/471 r/w 120 B IPC leh section 13 (2) r/w 13 (1) (c), (d) of PC Act, 1988 angin a hnuai a mi ang hian hremna a pe. Mi pakhat chu kum 4 tang tur leh nuai thum chawi tura tih a ni a, a dang chu kum li tang tur leh nuai 3 chawi turin an chungthu rel a ni.

Heng hremna pek te hi Kum 2007 bawra India leh Bangladesh ramri hung hna (Indo-Bangla Border fencing) thawh na tur atana sawrkar in mimal ram a lak sak ah Ram Pass (LCS) lem 35 zet hmangin zangnadawmna dawng a puh niin thubuai hi siamsak an ni. Hemi thubuai hi CBI ten an chhui hnuah Special Judge, Prevention of Corruption Act, HTC Lalrinchhana chuan mi 23 chu thiamloh a chantir a, vawiin khan hremna hi tihchhuah a ni.

Ranga Mohan Chakma hi hemi thubuai ah hian a meizang hlap tu ber leh Ram Pass dik lo zawng zawng pe chhuak tu a nih avang in hremna na deuh zawk pek a ni a, kum li (4) chhung lungin a tang anga, pawisa cheng nuai thum (3 lakhs) a chawi bawk ang a, a pawisa chawi tur hi a pe theilo a nih chuan thla kaw (9) chhung lungin tan in a tlak thei ang.

Midang 22 te hi chu kum khat (1) theuh lungin an tang anga, pawisa cheng nuai thum (3 lakhs) theuh an chawi bawk anga, an pawisa chawi tur hi an pe theilo a nih chuan thla kaw (9) chhung lungin tan in an tlak thei ang.

Hemi thubuai kaihhnawih a lungin an lo tan tawh te hi an tan hunchhung tur atan chhiar luh tel tur a ni thung.

Police ten an la man theih rih loh Accused No. 11 Patul Chakma leh Accused No. 17 Tamanna Chakma te chu dikna-a rorelna hlenchhuah ngei a nih theihna atan bail theihloh manna thupek, hun tiam bik awm lo a man an nih hma atana kenkawh tur (Standing Non-bailable Warrant of Arrest) pechhuak tura thupek siam a ni bawk. Court hian CBI te hnen ah hian he mite pahnih chunga dikna hlenchhuak tur hian a tul angin court-ah dilna (Criminal Miscellaneous Application) pawh theh lut leh thin thei tur in zalenna a pe a ni.

Tin, hemi thubuai kaihhnawiha pawisa man ₹ 9,25,500/- hi chhuh sak niin, sawrkar sum bawma chhun luh nghal tura thupek siam alo ni tawh bawk.