Zirsangkima

‘Depression ka nei’ i inti a, ‘Thih ka châk,’ i ti maw? ‘Aw le…mahni châkna kawnga kal thin mihring vek kan ni alâwm, nang pawh i châkna kawng chu zawh la… mahse—i thi dawn! Kan zîng atã awm tawh lo tûrin i thi daih dawn! A ngaih chu kan ngai ngawt ang che. Mahse, i thi tawh dawn! Chutia i thih hma chuan hêng thute hi lo hria la kan duh che:

Keini i thiante hian kan ngai ngawt ang che’ng a; tin, kan ui viau bawk ang che. Mahse, awmzia a awm tawh dawn lo. Nang chuan min liamsan vang vang tawh dawn a, i awm ve tawh dawn lo a, kan kâwm thei ngai tawh lo ang che!

Mahse, keini i thiante erawh hi chuan, i awm ve tâk loh avângin nâwi kan thulh ngawt thei lo. WhatsApp group-a inkawm kan sim phah dawn chuang lo; mahse, nang chu i tel ve thei tawh lo ang! Tin, i awm ve tawh dawn miau loh avângin group atang paw’n kan remove ang che. Mitthi phone number leh thlalâk kawl reng hlau pâwl te pawh kan awm!

I tel ve dawn tâk loh avâng hian keiniho hian chaw ei khâwm leh inhmuh khâwm kan sim phah ngawt dawn lo a, zân thla êng hnuaia zaiho te pawh kan thulh phah thei ngawt lo. Tin, i awm ve tâk loh avâng maia picnic lo ngawt thei pawh kan ni lo—hlim kan thulh thiang tlat lo alâwm. Kan sûn loh vâng che pawh ni loin. Keini chuan la dam la, la hlim la kan duh che a. Mahse, nang chu i rawn hlim ve thei tawh lo ang! Hlim tlân aiin thih i thlang miau zâwk si alâwm le! Thi tawh hnu rawn hlim ve viau thu a awm lo; rawn hlim ve zêl ta la, kan hlau ngawt zâwk ang che! Mitthi tawh rawn hlim viau kan hlau vek!

I thih nî chuan i ruang kan rawn kîl ve ngei chu a ngai ang…kan thianzaho hian. A ui pawh kan ui viau ang che’ng a; a tap tâwkte pawh kan awm ang. Mahse, hei hi hre rawh: kan uiin kan ngai reng hman dawn lo che, tih hi. Kan buaiin kan tûl ve a, tih tûr nei theuh kan ni ve a…

I talent neihte hi kan hria. Kan neih ve loh talent i kawl tih pawh kan hai lo, keini i thiante hian. Rawn hmang leh teh, rawn chhawr tangkai leh zâwk la kan ti che asin. Min tihlimtu i nih thinzia te kha kan hria… min tihlim leh tûrin kan la duh che.

Hawh teh, rawn tel leh mawlh zâwk teh … kan hnênah, kan kiangah, kan bulah hian!

Keini hi kan tling lo tih kan inpawm a, kan fel bîk lo. Mahse, nang anga indawm kun reng thin mi kan ni ve lo. Depression hi tûnlai natna, inlâk changkânna—fashion emaw kan ti ve lo.

Ka thian, i lungngai a, beidawng ngawih ngawihin i indawm kûn tih chu kan hriatpui che alâwm. Mahse, ‘Lo tho teh,’ tiin kan âu che a nih hi. I tho thei a, i ding thei tih kan chiang. Kan hrechiang che. I thei tih hi hrechiang tak kan ni. Insit suh, indem suh, indawm kûn suh. ‘Ka tho leh dawn, ka dam leh dawn,’ tih hlã hi sa teh. I tho leh thei, i dam leh thei. I duh phawt chuan, keini pawh kan awm alawm, tanpui i ngaih phawt chuan.

Hrui hrual aiin Bible hi melh zâwk la. Kan intihhmuh depression hi fashion-a hman chî loh ber a ni ta ve ang. Depresseda inngai tam tak hi depression nei an ni lo; depression nei nia an inngaih vâng mai mai zâwk a ni châwk—Dr. Hrekima paw’n a ti.

Nang chu i ni ve lo! Nì tûr pawn inphal suh. A nêpthlâk lutuk!

Depression i nei lo tih hi inpawm mai rawh! Mi hlim thei tak i nih thin kha…Damdawi leh zû avângin i buai thin tih pawh kan hria e. Mahse, i beih lêt duh hun apiangin i tân kan awm tih pawh i hriat kha. Kâr khat i nghei pawn i hmêlah a lang a, kan lo lãwm ve êm êm thin. Zû avânga hrehawm pawh i tawrh theih chuan a tel loa hrehawm chu i tuar thei ang tih kan hriatpui che.

Thiannu, i KS thin tih pawh kan hria, i kalsan châng khan kan lo lãwm ve thin. I harsatna kan hria a—sim la kan duh che. Intihhlum hial duhna thlentu che kha kalsan hmak rawh. Hawh teh, nun thar i’n din dâwn teh ang. Nang tanpui duhtu thian, heti zât hi i la nei a, zãm mah ta che. Inzuar tawh reng reng suh.

Beidawnga vuiin, nun ning viau thin mah la, beiseina hian tichak thin che rawh se. I nun kha, kawng dikah khalh la, i vuina leh i chak lohna chu nangmah tichaktuah hmang hlauh la—mi tharah lo chang zâwk teh khai. I thei khawp a ang. Kan sâwm tak meuh meuh che; i mal lo a nia … keini kan awm alâwm.

Israel-te lal ropui, Jehosaphata kha, hmêlmâten an hual thup a. A a sipaite kha an thi mang mai dawn tih a hrechiang a; a beidawng hman dawn hial mai. Tih ngaihna rêng rêng a hriat loh hnû khan, heti hian Pathian hnênah a tawngtai a: ‘A tihngaihna rêng rêng kan hre bawk hek lo, i lam kan lo hawi mai zâwk a ni e,’ a ti; LALPA chuan a chhanhim chiang khawp mai.

Zû, drugs emaw sex emaw pawh ni sek sek rawh se, hêng hi kan hmêlma lian takte an ni. A tihngaihna rêng rêng kan hriat loh hnuah, Lalpa hnêna tlûk luh tawp mai hi, kan tih tûr, kan belh tûr, kan rinchhan leh kan phen tûr a lo ni zâwk.