Paraguay chhim lam khaw pakhat Villa Hayes bula Confuso luiah chuan thil mak danglam tak a thleng a, an khaw tan tlangtu lui pakhat chu sangha te thlanmual tih mai turin sangha thi hlirin a khat. 

Hetianga sangha tam tak a thih chhan hi hriat theih mai a ni lo va, mi tam tak chuan he khuaa industry atangin sangha huat zawng tak emaw tur lui-ah chuan an paih emaw an ti luang lut a nih an ring. Villa Hayes, Paraguay-a thil thlenni tak hi puithuna thila an ni serh thin Friday the 13th a lo ni bawk nen he chanchin hi a darh zauhin an sawi punlun nasa zual nghe nghe. 

Confuso luiah hian sangha sing tam tak thiin lui kuang chhungah chuan sangha a pe var un mai bawk a, social media lam atanga chanchin an hriat hnuah thuneitute lam pawhin, sangha thih chhan hi an chhui chiang dawn a ni. 

Kum 25 mi Dalila Arce-i chu Villa Hayes khuaa cheng hi a ni a, he luia sangha thi hmu hmasatu leh a thlalak leh video te thehdarh hmasatu a ni. A thlalakah chuan lui tui chunga sangha thi lang var suau hmuh tur a awm bawk. Arce-i chuan sangha te hi chi hrang hrang an nih thu a sawi bawk. A video-ah Arce chuan, he thil thleng hi sorkar lam chuan chhui chiang ngei se a duh thu a sawi lang a, chu chuan nidang zela hetiang thil thleng thei lakah an lui leh sangha te chu an him thei phah a ring a ni. 

Arce chuan luia a kal tumin sangha thi tlim hmur mai chu a hmu a, a bul hnaia awm te an rawn kal ve bawk a, kan thlalak te chu thuneitute lama pressure siam nan tiin an thawn darh thu a sawi bawk. A tukah chuan Municipal thuneitute rawn langin SEAM lamin an rawn zui ve bawk a, an ni lam pawhin chutiang a lui tura hrai nia an rin thenhat chu an hmuh tawh thin thu chu an sawi a, mahse chutiang a tam sangha thi chu an la hmuh ngai loh thu an sawi thung.