ZALEN Oct. 1, 2024; Saitual- Saichal kawnga Vaibek ram stone quarry Social Mediaa lung tha lo kawng siamna atana hman mai tura lak nia thehdarh awm chu vawiin khan MSPMC-in an tlawh a, a lung dinhmunte enfiahin, test turin sample an la nghal bawk.

Mizoram State Project Monitoring Committee hian Er. Lalthanzuala Ralte, Secretary, MSPMC hoin Saitual - Saichal kawnga Vaibek rama Lungmuana stone quarry hi an enfiah a, heihi tunhnaia social media-ah lung tha lo kawng siamna atana hman mai tur anga lak nia sawi a awm vang a ni.

Er. Lalthanzuala Ralte chuan, he quarry-a lung hi a chang lo a, a pianpuizia anga rei tak a awm theih loh avangin kawngpui siam nan a hman tlak lo a. Hetiang hi Indian Standard Code of practice ang chuan hman phal a ni lo, a ti. Er. H. Laldintluanga, Asst. Prof. Civil Engg. Dept, MZU, MSPMC member pawhin, he quarry-a lung chu ‘Shale rock’ a ni a, pan tetea a til thin avangin tuiin rei lote a chiahin an pianpuizia (properties) awlsam tein a inthlak thin a. Kawng siamna atan a hman tlak loh a, fur a lo nihin chirhah a chang mai thin, a ti.

Er. Laltlanthangi Ralte Sr. EE, PWD, QCR&D Division leh Quality Control team ten quarry lung sample an la a, zirchian turin MPWD Central Laboratory, Zuangtuiah an test dawn a ni. Quarry neitu leh enkawltu Pi Hmingsawithangi chuan lung hi August 2024 thla atangin NHIDCL-in an la tih a sawi a, lung hi hmun dangah an pek ngai loh thu a sawi bawk.