ZALEN September 20, 2024 : Vawiin khan Congress Party chuan Congress Bhavan-ah ‘Friday Political Session’ an hmang a. He hunah hian MPCC General Secretary Joseph Lalhimpuia, PAC Member ni bawk chuan thusawiin Lunglei-a Council of Minister meeting neih chu sum sen a sang hle tih a sawi a, ei leh in man ringawt pawh nuai 321565 zet a nih thu a sawi.

Mahima chuan, "Mizoram a la awm ngailo, Council of Minister meeting chu boruak lian tak hnuaiah July 2, 2024 khan Lunglei-ah neih a ni a. Meeting zawh chuan ei in man senso cheng nuai 321565 /- ba thinna Aizawl-ah thawn phei an ngai phawt a. Chu mai a la ni lo, April ni 18, 2023 a lakluh ZPM councilor ten thla 16 an hmang ve chauh chungin an lawmman chu za zelah 106 % laiin an tipung hem mai ni."

"Tichuan municipal sum tuak nan parking fees an ti to ta vak a, Lunglei mipui an phun ta sup sup mai a ni. Council of Minister Agenda 14 atangin 6 an pass a, 6 zinga 2 hi mipui phurrit siamtu a ni. Petrol leh Diesel man tih san vakna leh LMC lawmman reilote chhunga 106 % a tihpunna a ni. He meeting Lunglei DC leiba cheng nuai 321565/- bakah HPC sum nuai 116800 /- hman a ni a, Aizawl atanga official, Chief Minister atanga peon thlengin kal mi 134 an kal a ni. He meeting a kal te thlenna leh TA/DA senso nuai tam tak ala awm cheu bawk."

"ZPM LMC hlawh punna tur a meeting atanga ni sarih chhung, ni hnih holiday awm chunga order chhuak hman ang hian CSS leh thil dang, kawngchhia-ah te hian action la hma se a va lawmawm dawn em aw! Hlawhpung hma leh pung tam, order chhuak hma record a ni thei hial ang," a ti bawk.

MYC Chairman hlui chuan, "Khaikhin tur remchang tak awm chu Pu Hawla kaihhruai congress sawrkar ah khan thla nga na ah Lunglei High Powered Committee chu Baptist Hqrts ah neih ani a, thil tam tak zingah Lunglei Convention Centre, nuai 1877.40 seng a sak a rel a, vawiin thlengin Lunglei mipuiin an hmang tangkai em em a ni," a ti.