Aizawl; Nimin Inrinni khan Chief Minister Zoramthanga chuan District Court, Lunglei chu a hmunah court lam hotute nen tlawhin a aia lian zawk leh thaa sak a nih theih nan a hmun tur an enhoa. A hnuah CM hian press meet nei lehin court zauh chu tul leh tha a tih thu a sawi a. World Bank kawng chu siamthat tul thu CM chuan sawi bawkin Myanmar raltlante hum a tum zel thu leh central ah ziak leh palai nen bawhzui mek a nih thu a sawi. 

    Chief Minister chuan, "Democracy rama rorelna dik tak a kal theih nan executive, legislative leh judiciary te an awm a, a khawi amah hnufual thiang a ni lo a, District Court Lunglei building sak zauhna tur chu court (Gauhati High Court) lamin pawisa an neih tawh thu min hrilh a, building tha tak leh zau zawk sak an phu ka ti a ni," a ti. Media mite zawhna chhangin CM chuan, "A ram zauhna tur chungchangah department pathum- PWD, ICT leh Commerce and Industries te an tel avangin cabinet-ah sawiho a nih hnuah thutlukna siam a ni ang," tiin a sawi.

    CM chuan Myanmar raltlante chu Mizoram chuan hum a tum zel thu leh central lama pawh an thlen tawh bakah an thlen zel tih a sawi bawk a. Central lam an kar dan sawiin, "India in Myanmar a puih nasat avangin mipuite'n India a inhawng tih an hria a, 90% mipuite chu China ngaitheilo an ni a, sipai sawrkar chu China sawrkar puih tih an hre bawk a. Hei vang hian China an hua a, Thailand pawhin ramri ah raltlante tan camp a siamsak laia raltlante thawn kir an nih leh si chuan an rilru tihdam nan thangkhat lian a liam a ngai dawn a ni," tiin raltlan thawnkir chu thil tih chi a nih loh thu a sawi bawk. CM sawi danin Mizoram MP 2 leh H Rammawia te chu a tirhin Delhi lamah raltlan hum thuah mi pawimawh te dawr kualin an che zel niin a sawi a. Mos for Home, Vice President of India, foreign secretary leh mi pawimawh dangte an hmu tawh a, midang pawh an la dawr zel tur thu a sawi a ni.

    Sawrkar laipui chuan hriattirna chhuahin Myanmar raltlante India ram lo lut lo turin North East ah state 4 te a lo hriattir tawh a, Mizoram pawh lehkhaah chuan a thailan tel a ni a. He lehkha zawm hi thil theih a nih loh thu CM hian lehkhain Central a hrilh tawh a, palai a tir bawk a ni.

    Press meet ah hian World bank kawng chu siamthat mek niin siamthat zel dan turah ngaihdan thar a neih thu sawiin hmalak a nih tur thu CM chuan media kalkhawmte a hrilh bawk a. Kawngtha neih pawimawh a tih thu sawiin, "Chhim lam kan kawtchhuah a ni mai dawn a, Akyap atangin bungraw phur an rawn lut dawn a kawng chungchangah hmalakna lian tham neih a ngai dawn a ni," a ti bawk.