Aizawl May 8, 2023 : MPCC Gen. Secy Joseph Lalhimpuia, Ex MLA chuan India Sawrkar-in India rama Fire Service tha ber atana a thlan, Lunglei Fire Station-in Subash Chandra Boss Aapda Prabandhan Pushkar Award 2023 a dawn, tangkafai Cheng Nuai 51 bakah staff te tana Rs. Nuai 5-a pek chu Fire Deptt tih changtlun nana tun thlenga hman a la ni lo chu rilru nat thlak a tih thu a sawi.

Mahima chuan, "He lawmman March 10, 2023 khan Mizoram sawrkar account ah a lut tawh a, hmanni a Home Minister Lunglei-a a lo kal khan Aizawl lam atangin an hotu ten thutphah, fridge, TV vel an dah luh tir. Congress sawrkar lai kha chu nise Fire deptt staff te hi sum hi kan pe ang. Rs Nuai 51 pawh hi Lunglei Fire deptt tih changtlun nan hmang ngei se ka duh," a ti. Mahima chuan, "Congress sawrkar lai vek khan Lunglei by-pass road siam nan Rs. Vbc. 10 leh Circuit house sak thatna tur Rs. Vbc. 10 kan dah pawh an pawt peng a, MNF hian min hlamchhiah pawh a ni lo, min hmusit ni ber in ka hria," a ti bawk.

Lunglei East MLA hlui chuan, "Pathianin Congress party hi a sawrkar tir leh ngei a rinawm a, chumi atan chuan tanrual a pawimawh a, Lunglei khawpui chhung bikah phei chuan hnehna chan theihna a sang hle. Karnataka Assembly inthlan lo awm turah pawh Congress in hnehna an chan hi Media lian te pawhin an ring vek tawh a ni," a ti.

ZPM chungchang sawiin, "A pawn leh chhungah anmahni inbeihna in hun an hmang a, ZPM Southern Hqtrs Lunglei inthlanah pawh vote nei thei aia tamin vote an thlak a, chumi in a nghawng chuan MLA Candidate tur thlengin a nghawng ta a ni. ZPM te chu mi sawisel ringawta bul tan an ni a, hei hi kalphung thar an tih chu a ni ber a, hei ai chuan kalphung nghet leh kalphung dik hi a tlo zawkin a rinawm," a ti.

Mahima hian tunhnaia Manipur state,-a Zohnahthlak te tawrhna leh harsatna chu pawi a tih thu sawiin dinhmun pangaiah awm leh thuai se a duh tih a sawi.