Lunglei laboratory sak contractor tur PWD - Dr R. Lalthangliana, H&FW Minister

Admin - Jun 20, 2021

PWD chu contractor tur an nih thu leh tunah chuan pawisa hmanna tur a la awm loh thu a sawi

Aizawl : Civil Hospital Lunglei compound-a laboratory, RT-PCR khawl pawh bun theih na tura hmalak tan mek chu PWD kuta dah a nih thu Health minister Dr. R. Lalthang-liana chuan ZALEN a hrilh a. PWD chu contractor tur an nih thu leh tunah chuan pawisa hmanna tur a la awm loh thu a sawi bawk.

Laboratory building sakna tur atan hian sawrkar chuan cheng nuai 781 man DPR a siam a, hei hi NEC leh DoNER lamah thehluh tawh niin Chief Minister Zoramthanga pawhin D.O letter in a umzui tawh thu Dr. Thangtea chuan a sawi a, mahse, pawisa hi sanction hun tur a la hriat loh thung. Chutihrualin Mizoram sawrkar chuan he hna hi a thawk tan nghal a ni.         

Dr. R. Lalthangliana chuan,"Tunah chuan pawisa hmanna tur a la awm lo a, PWD in hna hi an thawk nghal a, anni hi contractor tur pawh an ni ang," tiin ZALEN a hrilh.

MINECO-a Contact Tracing chung chang sawihonaah laboratory building chung chang hi a lo sawi chhuak tawh a, hemi tum hian Dr, R. Lalthangliana chuan, "He laboratory sakna tur hi engtikah nge kan hmuh theih dawn tih a la hriat chiah rih loh laiin CM hmalakna leh thahnemngaihna zarah Mizoram sawrkar chuan a building sak hna tan turin ruahmanna kan lo siam fel tawh a ni," a ti.

Building sak zel tur chungchang chu technical thil anih avangin sawi tur a hriat ve loh thu ZALEN a hrilh a. "Architect leh department lamin hei hi chu a tul angin an buaipui mawp mawp a, mipui mamawhna a san tawh avangin hmanhmawh takin hma kan la nghal a ni," a ti.

Share now