Aizawl January 20, 2023: Mizo National Youth Front (MNYF) Headquarters hruaitute chuan vawiin khan MNF Sub-Headquarters, Lunglei office an tlawh. MNYF President Dr. L Thangmawia MLA chuan, "Lunglei khawpui enkawltu Municipal Council inthlan kan hmachhawn dawn avangin MNF mipuite kan tanrual a ngai a, Lunglei mipuite pawhin Municipal Council dinsaktu MNF sawrkar hnenah lawmthu sawina an lantir ngei ka beisei," a ti.

Dr. L. Thangmawia MLA chuan, Chief Minister Pu Zoramthanga kaihhruaina hnuaiah MNF sawrkar chuan Lunglei mipuite hmasawnna turin hmasawnna hna tamtak a thawk. Kumin chhunga chhungkaw nuai 1 tuamchhuak thei turin SEDP pawh kalpui mek a ni," a ti.

He hunah hian MNYF Vice President Zodinpuia pawhin thu sawiin, "Kum 2018-a MNF-in a Manifesto ah zirlai leh thalaite tan hmalakna tura tarlan point 11 chu tihhlawhtlin vek a ni tawh," a ti. Aizawl khawpui chhungah MNF boruak a that chhoh zel thu sawiin, "Aizawl khawpui chhunga Local Council 85 awmah MNF chuan Local Council 76 ah rorelna a chang vek a, Congress in Local Council 5 leh ZPM in Local Council 2 an chang a ni," a ti. ZPM chu Aizawl mipuiten rinna nghahna tlaka an ngaihloh avangin ZPM MLA bial 5 chhunga Local Council 45 awmah ZPM chuan Local Council 1 an changve hram a ti bawk.

MNF Thalai hruaitute vawiin vek hian Lunglei Municipal Council office an tlawh a, MNYF hruaitute hi CEO H.Lalhmingthanga chuan a lo dawngsawng a, Lunglei Municipal Council  hmalakna hrang hrangte a hrilhfiah. MNF Thalai President Dr. L Thangmawia chuan, MNF sawrkar in Lunglei mipuite a ngaihsak avangin sum harsatna hnuaiah pawh Municipal Council inrelbawlna turin kum 2021-2023 chhungin cheng nuai 160 chuang budget aṭangin a ruahmansak tawh thu a sawi a ni. 

Lunglei Municipal Council inthlanna hmasaber hi kum March 2023 chhunga neih turin Mizoram sawrkar chuan hmalakna a kalpui mek a. LMC huamchhungah hian Ward 11 awm in, Village Council 24 a huam dawn a, voters 40,541 an awm dawn a ni.